Алматы қаласы Орталық Азияның іскерлік, туристік және мәдени орталығы ғана емес, сонымен қатар жаңа халықаралық гастрономиялық бағыт ретінде де өз позициясын нығайта түсуде. Алғаш рет аймақ тарихында қала Gault&Millau — әлемдік гастрономиялық күн тәртібін қалыптастыратын ең беделді мейрамхана гидтерінің бірімен ынтымақтастықты бастады, деп хабарлайды Almaty.news ақпарат агенттігі.
Бұл оқиға тек Алматы үшін ғана емес, бүкіл Орталық Азия үшін стратегиялық маңызға ие. Мұндай деңгейдегі гастрономиялық гид алғаш рет аймақ нарығына шығып, халықаралық қауымдастыққа жергілікті мейрамхана индустриясын, аспаздарды және бірегей гастрономиялық мәдениетті ашады.
«Алматы үшін бұл халықаралық деңгейдегі тарихи оқиға. Бүгінде гастрономия қалалардың туристік тартымдылығының негізгі драйверлерінің біріне айналды. Gault&Millau-мен әріптестік Алматыға әлемдік гастротуристер аудиториясына жол ашып, қаланың әлемдік туристік картадағы орнын нығайтады», — деп атап өтті Алматы қаласы Туризм басқармасы.
Gault&Millau — 50 жылдан астам тарихы бар аңызға айналған француз гастрономиялық гид, ол Michelin Guide-пен қатар жоғары асхана индустриясындағы негізгі әлемдік бағдарлардың бірі болып саналады. Гидтің қалада болуы Алматының жаһандық гастрономиялық экожүйеге қосылуын білдіреді, мұнда жаңа трендтер қалыптасып, үздік мейрамханалар анықталып, жаңа туристік бағыттар жасалады.
Бүгінде Алматы — бұл тек тау туризмі, табиғат және мәдени мұра ғана емес. Бұл серпінді дамып келе жатқан мейрамхана индустриясы, күшті жергілікті өнімдері, талантты аспаздары және Орталық Азияның жетекші гастрономиялық хабы болуға ұмтылысы бар заманауи мегаполис.
Дереккөз: Almaty.tv