Халықаралық балаларды қорғау күні қарсаңында Қазақстан бойынша дәстүрлі «Балаларымыз – аманатымыз» қайырымдылық акциясы басталды. Оның аясында 20 000 балаға балмұздақ пен сыйлықтар таратылады, деп хабарлайды Almaty.news ақпарат агенттігі.
Әлеуметтік бастама Қазақстанның барлық өңіріндегі 135 балалар мекемесін қамтиды — ірі қалалардан бастап моноқалалар мен ауылдық елді мекендерге дейін. Жобаны «AMANAT» партиясы «Шин-Лайн» корпоративтік қорымен бірлесіп жүзеге асырады. Ол ата-анасының қамқорлығынсыз қалған және қиын өмірлік жағдайдағы балаларды қолдауға бағытталған.
ҚР Оқу-ағарту министрлігінің дерегінше, елімізде 20 798 жетім және ата-ана қамқорлығынсыз қалған бала бар. Оның 82%-дан астамы отбасыларда — қамқорлықта, патронатта немесе асырап алушы отбасыларда тәрбиеленіп жүр. Бұл отбасылық тәрбие формаларына көшу үрдісін көрсетеді. Қазақстанда балалар мекемелері жүйесі белсенді түрде өзгеруде: классикалық балалар үйлерінің орнына баланы сүйемелдеуге, бейімдеуге және дамытуға бағытталған балаларды қолдау орталықтары желісі жұмыс істейді.
Биылғы акция 20 өңірдегі негізгі мекемелерді, соның ішінде балаларды қолдау орталықтарын, мамандандырылған интернаттарды, балалар үйлері мен оңалту орталықтарын қамтиды.
«Арнаулы әлеуметтік қызметтерге мұқтаж балаларды қолдау орталығы №2» КММ-де өткен іс-шара барысында «AMANAT» партиясы Алматы қалалық филиалының төрағасы Станислав Канкуров атынан педагогтар мен мекеме қызметкерлері жоғары кәсібилігі, көпжылдық адал еңбегі және балаларды тәрбиелеу мен қолдауға қосқан үлесі үшін алғыс хаттармен марапатталды.
Акция аясында балаларға 20 000 порциядан астам балмұздақ — жаздың, қуаныш пен балалық шақтың символы табысталады.
«Шин-Лайн» корпоративтік қорының жеке бағыты — балалар мекемелеріне жүйелі қайырымдылық көмек көрсету. Корпоративтік әлеуметтік жауапкершілік стратегиясы аясында «Мишка на полюсе» балмұздағы сатылымының 1% қордың әлеуметтік жобаларына, оның ішінде мамандандырылған мекемелерге көмек пен балаларға арналған білім беру бастамаларын қолдауға жұмсалады.
Компанияда балмұздақ балалардың сүйікті тәттісі ғана емес, сонымен қатар қамқорлық, жылулық пен көңіл бөлудің символы екенін атап өтеді. «Балаларымыз – аманатымыз» акциясы қоғамға әрбір баланы қолдаудың маңыздылығын және балаларға бақыт пен мереке атмосферасын жасауды еске салуға арналған.
Дереккөз: Almaty.tv