14 маусымда Алматыдағы Орталық стадионның қосалқы алаңында Қазақстан Республикасы халқының Президенттік дене шынықтыру дайындығы тестілері өтті. Ауқымды спорттық іс-шараға әртүрлі жастағы – мектеп оқушыларынан бастап егде жастағы азаматтарға дейін 1000-нан астам қала тұрғыны қатысты, деп хабарлайды Almaty.news ақпарат агенттігі.
Президенттік тестілер азаматтардың дене дайындығы деңгейін анықтауға бағытталған мемлекеттік нормативтер жүйесі болып табылады. Оларды өткізу бұқаралық спортты дамытуға, салауатты өмір салтын насихаттауға және халықты жүйелі түрде дене шынықтырумен айналысуға тартуға ықпал етеді.
Тестілеу аясында қатысушылар әртүрлі қашықтыққа жүгіру, турникте тартылу, орнынан ұзындыққа секіру және басқа да сынақ түрлері бойынша нормативтерді орындады. Көптеген қала тұрғындары үшін іс-шара өздерінің физикалық мүмкіндіктерін тексеру, дайындық деңгейін бағалау және нәтижелерді белгіленген нормативтермен салыстыру мүмкіндігіне айналды.
Сынақ қорытындысы бойынша ұлдар, қыздар, ерлер және әйелдер арасында 20-дан астам жас санатында үздік қатысушылар анықталды. Жоғары нәтижелерді 14–15 жас аралығындағы қатысушылар арасында 20 рет тартылған Нұрғазы Дамир, 24–31 жас санатында 34 рет тартылған Изигазинов Нұрбол, 100 метр қашықтықты 10,73 секундта жүгіріп өткен Мұратқалиев Дональд, сондай-ақ 1000 метрге жүгіруде 3 минут 14 секунд нәтиже көрсеткен Халықбай Дидар көрсетті. Қыздар арасында орнынан ұзындыққа секіруде Виталина Цехоцкая мен Ева Кадырова үздік атанды.
Президенттік тестілерді өткізу жыл сайын мыңдаған қазақстандықтарды біріктіріп, спорт пен дене белсенділігін насихаттаудың маңызды құралдарының бірі болып қала береді. Мұндай іс-шаралар салауатты өмір салты мәдениетін қалыптастыруға ықпал етеді және тұрғындарды жүйелі спортпен айналысуға тарту үшін қосымша мүмкіндіктер жасайды.
Дереккөз: Almaty.tv