Алматыда Халықаралық балаларды қорғау күні қарсаңында «Тау Жүрек: Биік мәдениет» жобасы іске қосылды. Бұл бастама тауда қауіпсіз және жауапты мінез-құлық мәдениетін қалыптастыруға бағытталған, деп хабарлайды Almaty.news ақпарат агенттігі.
Ауқымды бастама президенттің «Таза Қазақстан» экологиялық науқанын қолдау мақсатында жасалған. Ұйымдастырушылардың айтуынша, жобаның басты мақсаты — экологиялық ағарту аясын кеңейтіп, 100 мың тұрғынға қауіпсіздік, эко-этика және тау мәдениеті туралы базалық білім беру. Жоба авторы — ҚР альпинизм және спорттық жартасқа өрмелеу федерациясының президенті, қоғам қайраткері Нұрсұлтан Шоқанов. Бұл бастама әсіресе өңірде «Алматы тау кластері» маңызды жобасы жүзеге асып жатқан кезде өзекті. Инфраструктураның дамуы көбірек адамды тартып, тау мәдениетінің деңгейі соған сай болуы керек.
Өзектілікті сандар растайды: туристік ағынның өсуіне байланысты таудағы оқиғалар саны 30%-ға өсті. Негізінен 14 пен 23 жас аралығындағы дайындықсыз жастар қауіпке ұшырайды, ал 2025 жылдың толық емес кезеңінде құтқарушылар 69 рет алғашқы дәрігерге дейінгі көмек көрсетуге мәжбүр болды, — делінген хабарламада.
«Тау Жүрек» бағдарламасы жаппай туризмге деген көзқарасты өзгертіп, оны саналы және қауіпсіз етеді. Бұл ұзақ мерзімді бағдарлама, ол әртүрлі кезеңдерде балалар үйінің тәрбиеленушілерінен бастап, мектеп оқушылары, студенттер, спорт қауымдастығы, блогерлер, журналистер, педагогтар және билік өкілдеріне дейін біріктіріп, биіктікке құрмет мәдениетін мегаполис өмірінің жаңа стандарты етеді.
Жауапкершілік маршрутына алғашқы болып «Солнышко» балалар үйінің 50 тәрбиеленушісі шықты. 28 мамырда олар алғашқы білім беру жорығына аттанды. Нақты қауіпсіз туризмнің қандай болу керектігін көрсету үшін Федерация теңдессіз сүйемелдеу тобын ұсынады: 50 балаға — 10 педагог, бес кәсіби гид, дәрігер және Құтқару қызметінің тобы.
Бұл жоба дәлелдейді: «Таза Қазақстан» жалпыұлттық науқаны — бұл тек қоршаған ортаның тазалығы ғана емес, бұл мінезді жүйелі тәрбиелеу және жаңа экологиялық мәдениет. Тау кездейсоқ адамдарды көтермейді, ал нағыз биікке тек тәртіп пен туған жерге құрмет арқылы жетуге болады, — деп атап өтті ұйымдастырушылар.
Еске сала кетейік, 350 мыңнан астам қазақстандық волонтерлікке тартылған.
Дереккөз: Inform.kz