Алматы маңындағы Қок-Жайлау үстіртінде салынып жатқан «Almaty Superski» тау курорты жас ерекшелігі мен физикалық мүмкіндіктеріне қарамастан барлық адамға қолжетімді болады. Осы қағидатты іске асыру үшін «Kazakh Tourism Development Ltd.» компаниясы «Алматы қалалық мүгедектер қоғамы» қоғамдық бірлестігінің төрағасы Ұлан Інкәрбековпен ынтымақтастық туралы меморандумға қол қойды, деп хабарлайды Almaty.news ақпарат агенттігі.
Құжат болашақ тау курортының инклюзивті инфрақұрылымын құру ниетін бекітеді. Қазақстан тарапынан «Kazakh Tourism Development Ltd.» басқарма төрағасы Ержан Еркінбаев қол қойды. Келісім бес жылға жасалып, тараптардың өзара келісімі бойынша ұзартылуы мүмкін.
Құжатқа сәйкес, Ұлан Інкәрбеков курорттың денсаулық мүмкіндігі шектеулі адамдар мен аз қозғалатын топтар үшін қолжетімділігін қамтамасыз ету мәселелерінде жобаға сараптамалық және консультациялық көмек көрсетеді. Ортақ жұмыс аясында инклюзивті инфрақұрылымға арналған стандарттар мен талаптар әзірленеді: орналастыру нысандары, жүру бағыттары, тамақтану орындары және қызмет көрсету аймақтары Қазақстан Республикасының заңнамасы мен халықаралық қолжетімділік стандарттарына сәйкес келеді.
«Almaty Superski – біз барлық алматылықтар үшін салып жатқан жоба. Қолжетімділік техникалық тапсырмадағы тармақ қана емес, ол курорттың алғашқы шешімдерінен бастап философиясына енгізілуі керек. Алматы қалалық мүгедектер қоғамымен ынтымақтастық бізге аз қозғалатын қонақтардың қажеттіліктерін кез келген жобалаушыдан жақсы түсінетіндермен әр қадамды үйлестіруге мүмкіндік береді», – деп атап өтті Ержан Еркінбаев.
Тараптар сондай-ақ курорттың денсаулық мүмкіндігі шектеулі адамдарға арналған бейімделген спорттық және рекреациялық бағдарламаларын бірлесіп әзірлеуге келісті. Мүгедектер қоғамының өкілдері инклюзивтілік пен туристік ортаның қолжетімділігіне қатысты жобаның көпшілік іс-шараларына, презентациялары мен сараптамалық талқылауларына қатысады.
«Ерекше қажеттіліктері бар адамдар үшін таулар ұзақ уақыт бойы қолжетімсіз арман болып келді. Бүгін Қазақстанда алғаш рет инклюзия соңында қосылмай, басынан бастап енгізілетін жоба пайда болды. Біздің қауымдастық үшін бұл – табиғатқа тең қолжетімділік алу ғана емес, сонымен қатар барлығына шынымен жұмыс істейтін ортаны қалыптастыруға қатысу мүмкіндігі», – деп атап көрсетті Ұлан Інкәрбеков.
Ынтымақтастық аясында қоғам өкіліне ұйымдастырушылық және ақпараттық қолдау көрсетіліп, жобалық құжаттама мен курорт тұжырымдамасы бойынша материалдар беріледі. Тараптар «Almaty Superski»-ді барлық санаттағы қонақтар үшін ашық инклюзивті туристік бағыт ретінде бірлесіп ілгерілетуді көздейді.
Меморандумға қол қою жобаның ғылым, мәдениет, спорт және қоғамдық ұйымдар қайраткерлері арасынан серіктестер шеңберін кеңейту желісін жалғастырады. Бұған дейін «Almaty Superski» экология, қауіпсіздік, мәдени мұра және таулы аймақтарды дамыту саласындағы бірқатар отандық сарапшылармен ұқсас келісімдерге қол қойған.
Дереккөз: Inform.kz