Алматыда 12-17 мамыр аралығында өткен грек-рим, еркін және әйелдер күресінен Қазақстан Кубогы отандық спорт маусымындағы ең жарқын және ауқымды оқиғалардың бірі болды, деп хабарлайды Almaty.news ақпарат агенттігі.
Алматы қаласының грек-рим, еркін және әйелдер күресі федерациясының президенті Омар Әлиев алматылық спортшылардың сәтті өнер көрсеткенін атап өтіп, Кубокты ұйымдастыру мен өткізуге қатысқандардың барлығына алғыс білдірді.
Қалалық федерация басшысының айтуынша, турнирге халықаралық деңгейдегі құрметті қонақтар мен басшылардың қатысуы ерекше мән берді. Жарысқа Азия күрес одағының (UWW Asia) басшысы Мохаммед Әл-Авамала қатысып, бұл халықаралық аренадағы қазақстандық күрес мектебінің жоғары беделін көрсетті. Кубок аясында сәуір айында Бішкекте өткен Азия чемпионатының жүлдегерлерін салтанатты марапаттау рәсімі де өтті.
— Біздің барлық медаль иегерлері жоғары кәсібилігі, берілгендігі және қазақстандық күрестің беделін нығайтуға қосқан үлесі үшін аталып өтілді. Қазақстанның грек-рим, еркін және әйелдер күресі федерациясы спортшыларды қолдауға және олардың жетістіктеріне үлкен көңіл бөледі. Мұндай рәсімдер жастарды шабыттандырып, ұрпақтар сабақтастығын көрсетіп, балуандарды жаңа жеңістерге мотивациялайды, — деді Әлиев.
Спорттық нәтижелерге келетін болсақ, алматылық балуандар үш стильдің барлығында алтын жеңіп алды. Әйелдер күресінде Алматы командасы жалпыкомандалық екінші орынға ие болса, еркін күрес жарыстарында командалық есепте жеңімпаз атанды.
— Кубоктың әрбір финалы дерлік жарқын әсер қалдырды. Әсіресе 70 келіге дейінгі салмақ дәлбесіндегі финалды ерекше атап өткім келеді, онда Алматыдан екі өкіл — Санжар Досжанов пен Ақымжан Бағдаулет кездесті. Жеңіске тәжірибелі Досжанов жетті. Сонымен қатар, осы салмақта қола медальды тағы бір спортшымыз — Родион Анчугин жеңіп алды, — дейді алматылық федерация президенті.
Омар Әлиевтің атап өтуінше, команданың бұл жетістігі отандық күрестегі бәсекелестіктің жоғары деңгейін ескере отырып, ерекше мәнге ие.
— Біз Алматы құрамасының қорытынды өнеріне қуаныштымыз. Соңғы бес жыл бойы республикалық күресте Жамбыл облысы көшбасшы позицияны ұстап келген еді, сондықтан біз үшін бұл нәтиже ерекше құнды. Алматы қазақстандық күрес мектебінің орталықтарының бірі екенін тағы да дәлелдеді. Күресіміздің дамуы үшін күнделікті еңбек ететін әрбір жаттықтырушы мен маманға алғыс айтқым келеді, — деп түйіндеді Омар Әлиев.
Естеріңізге сала кетейік, өткен ҚР Кубогының қорытындысы бойынша ұлттық команданың жаттықтырушылар штабы халықаралық турнирлерге қатысу үшін құраманың құрамын анықтайды.
Дереккөз: Inform.kz