Алматы полициясы әлеуметтік желілерді бақылау барысында пневматикалық және суық қаруды заңсыз сату фактісін анықтап, жолын кесті, деп хабарлайды Almaty.news ақпарат агенттігі.
Жедел іс-шаралар нәтижесінде айналымнан пневматикалық қару мен суық қаруға жататын заттардың партиясы тәркіленді. Осы факті бойынша қылмыстық іс қозғалып, қажетті тергеу амалдары жүргізілуде.
Полиция бұл жалғыз жағдай емес екенін атап өтті. Қарудың заңсыз айналымын болдырмау жұмысы жүйелі негізде, оның ішінде интернет-кеңістікті белсенді бақылау арқылы жүргізілуде. Бұл жұмысқа аудандық полиция басқармалары ерекше үлес қосуда. Олардың қызметкерлері күн сайын нысаналы іс-шаралар, жедел шаралар және тыйым салынған заттарды айналымнан алуға бағытталған профилактикалық жұмыстар жүргізеді. Мақсатты іс-шаралар басталғалы бері аудандық полиция бөлімшелері заңсыз айналымнан 619 бірлік тыйым салынған заттарды тәркілеп, анықталған фактілер бойынша сотқа дейінгі тергеулер басталды.
— Қарудың заңсыз айналымы, оның ішінде әлеуметтік желілер арқылы сатылуы қоғамдық қауіпсіздікке тікелей қатер төндіреді. Әрбір мұндай құқық бұзушылық — ауыр қылмыстардың жасалу қаупін арттырады. Полиция интернет-кеңістікті тұрақты негізде бақылап, жедел шаралар қабылдайды. Бұл бағыттағы жұмыс жалғасып, күшейтілетін болады, — деді Алматы қалалық Полиция департаментінің Қоғамдық қауіпсіздік басқармасының бастығы Тимур Ногайбаев.
Полиция қаруды заңсыз сақтау және өткізу үшін қылмыстық жауапкершілік қарастырылғанын ескертеді.
Дереккөз: Almaty.tv