Алматы әкімі Дархан Сатыбалды қалалық питомник құру және көгалдандыру жүйесін дамыту мәселелері бойынша кеңес өткізді, деп хабарлайды Almaty.news ақпарат агенттігі.
Қазіргі абаттандыру және құрылыс қарқыны кезінде қаланың отырғызу материалдарына жыл сайынғы қажеттілігі 1,4 млн данадан асады, оның ішінде ағаштар, бұталар және өтемақы отырғызулар бар. Алайда Алматыда меншікті мамандандырылған питомник жоқ, бұл сыртқы жеткізушілерге тәуелділік тудырып, өсімдіктердің бағасы мен жерсінуіне әсер етеді.
Әкім қаланың меншікті питомник шаруашылығын қалыптастыру көгалдандырудың тұрақты жүйесін құруға және қала ортасының сапасын арттыруға бағытталған стратегиялық міндет екенін атап өтті.
Жоба аясында қаланың оңтүстік бөлігіндегі бірнеше учаскеде питомник құру қарастырылуда. Сонымен қатар, аумақты кеңейту мүмкіндігі пысықталуда, бұл Алматыны бейімделген отырғызу материалымен қамтамасыз етуге және импортқа тәуелділікті азайтуға мүмкіндік береді.
Кеңесте заманауи өсіру технологияларын енгізу мәселелері де қаралды, оның ішінде жылына 1 млн көшетке дейін өнімділігі бар жоғары технологиялық микроклоналды көбейту зертханасын құру жоспарлануда. Бұл қаланы сапалы және бейімделген отырғызу материалымен қамтамасыз етуге, сондай-ақ сатып алу шығындарын азайтуға мүмкіндік береді.
Кеңес барысында шетелдік инвесторлардың жобаны іске асыруға қызығушылығы атап өтілді. Ынтымақтастық тетіктері мен инвестицияларды тарту пысықталуда.
Кеңес қорытындысы бойынша Алматы әкімі Дархан Сатыбалды профильді басқармаларға жобаны кешенді тәсілмен іске асыруды, оның ішінде жобалық шешімдерді түзетуді, ғылыми базаны дамытуды және өндірістік қуаттарды кезең-кезеңмен іске қосуды қамтамасыз етуді тапсырды.
Жобаны іске асыру қаланың жасыл қорын қалпына келтірудің тұрақты жүйесін қалыптастыруға, өсімдіктердің жерсінуін арттыруға және 2030 жылға дейінгі көгалдандыру жоспарларының тұрақты орындалуын қамтамасыз етуге мүмкіндік береді.
Дереккөз: Almaty.tv