AMANAT партиясы Алматыда көппәтерлі үйлердің өзекті мәселелерін шешуге бағытталған «TURGYNDAR AMANATY» жобасын іске қосты. Жиынға партия хатшысы Ержан Жылқыбаев, Алматы қаласының әкімі Дархан Сатыбалды, мәслихат депутаттары, мемлекеттік орган басшылары, сарапшылар, сондай-ақ мүлік иелері бірлестіктерінің (МИБ), пәтер иелері кооперативтерінің (ПИК) және басқарушы компаниялардың төрағалары қатысты, деп хабарлайды Almaty.news ақпарат агенттігі.
Алматы – еліміздегі ең ірі мегаполис. Қалада 9,5 мыңнан астам көппәтерлі тұрғын үй бар, оның үштен екісінен астамы ескірген тұрғын үй қорына жатады. Мыңдаған үй күрделі жөндеуді қажет етеді, тұрғын үй қорының едәуір бөлігі тозған. Қалада авариялық және сейсмикалық қауіпсіздігі төмен ғимараттар, сондай-ақ ескірген лифтілері бар үйлер бар. Жыл сайын уәкілетті органдарға тұрғындардан мыңдаған өтініш түседі.
Осыған байланысты AMANAT партиясының «TURGYNDAR AMANATY» жобасы азаматтарды толғандыратын мәселелерді шешудің тиімді тетігіне айналады. Жоба көппәтерлі үйлерді басқарудың тиімді моделін қалыптастыруға бағытталған. Осы мақсатта партия жанынан жобалық кеңсе құру, МИБ және ПИК төрағаларын оқыту, үйлерді күрделі жөндеуді сүйемелдеу, цифрлық шешімдерді енгізу және тұрғындардың абаттандыру бағдарламаларына қатысуын кеңейту көзделген. Халықпен тұрақты кері байланыс орнатуға және азаматтарды өз үйлерін басқару процестеріне тартуға ерекше көңіл бөлінеді.
AMANAT партиясының хатшысы Ержан Жылқыбаев жобаның маңызы мен мақсаттарына тоқталды.
Алматы қаласының әкімі Дархан Сатыбалды тұрғын үй-коммуналдық шаруашылық саласы халықтың өмір сүру сапасына тікелей әсер ететінін атап өтті. Оның айтуынша, Алматыда 9,5 мыңнан астам көппәтерлі үй және 2,5 мыңнан астам басқару субъектісі бар. Осыған байланысты тұрғын үй қорын жаңғырту және басқаруға жүйелі көзқарас қажет. Сондай-ақ Дархан Сатыбалды жұмыс тұрғындармен кері байланыс негізінде құрылатынын атап өтті.
«Тұран» пәтер иелері кооперативтері қауымдастығының төрайымы Бибігүл Жүніспаева тұрғын үй қорын жаңғырту және басқару сапасын арттыру шараларының маңыздылығын атап өтті.
Алматы қаласы ПИК қауымдастығының төрағасы Аркадий Рубцов саланы одан әрі дамыту үшін кадрлық әлеуетті күшейту және заңнаманы жетілдіру қажеттігін мәлімдеді.
Форум аясында мобильді қоғамдық қабылдау ұйымдастырылды, онда мемлекеттік органдар мен коммуналдық қызметтердің өкілдері тұрғын үйді басқару жөніндегі ұйымдардың басшыларына және қала тұрғындарына кеңес берді. Сондай-ақ тұрғын үйді күтіп-ұстау, күрделі жөндеу жүргізу және сервистік ұйымдармен өзара іс-қимыл мәселелері бойынша практикалық көмек көрсетілді.
Іс-шара барысында тұрғын үйді басқару жөніндегі ұйымдар қызметінің ашықтығын қамтамасыз ету, тұрғындардың шешім қабылдаудағы рөлін арттыру, цифрландыруды дамыту және депутаттар мен халық арасындағы өзара іс-қимылды нығайту мәселелері де талқыланды.
Дереккөз: Zakon.kz