Алматыдағы ірі көтерме сауда базары «Барыс-4»-те ведомствоаралық тексеру барысында 9 делдал анықталды. Мониторинг әлеуметтік маңызы бар азық-түлік тауарларының бағасын тежеу мақсатында жүргізілді, деп хабарлайды Almaty.news ақпарат агенттігі.
Тексеру 25 сәуірде өтті. Оған Сауда және тұтынушылар құқығын қорғау департаменті, Кәсіпкерлік және инвестициялар басқармасы, Мемлекеттік кірістер департаменті, Экономикалық тергеу департаменті және аудан әкімдіктерінің өкілдері қатысты.
Көтерме жеткізушілерді талдау барысында мамандар қызметі түпкілікті бағаның қалыптасуына әсер етуі мүмкін делдалдарды анықтады. Мониторинг қорытындысы бойынша осындай 9 субъект тіркелді.
Сонымен қатар, өңірлік комиссия аясында салық органдары кәсіпкерлерге хронометраждық зерттеулер жүргізіп жатыр. Сауда үстемесінің сақталуына ерекше назар аударылады — ол әлеуметтік маңызы бар өнімдерге 15%-дан аспауы тиіс. Сондай-ақ дұрыс ресімделген және қолжетімді жерде орналастырылған баға белгілерінің болуы тексеріледі.
Ведомстволар делдалдарды анықтау және бағаны бақылау жұмыстары жалғасып жатқанын, ал анықталған барлық жағдайлар бойынша материалдар өңірлік комиссия отырысында қаралатынын атап өтті.
Дереккөз: Inalmaty.kz