Алматыда «Әлеуметтік шеберхана» жобасы іске қосылды. Ол осал санаттағы жасөспірімдер мен жастарды қолдауға және әлеуметтендіруге бағытталған, деп хабарлайды Almaty.news ақпарат агенттігі.
Қалалық Жастар саясаты басқармасының мәліметінше, бағдарлама ата-анасының қамқорлығынсыз қалған және қиын өмірлік жағдайда жүрген жастардың практикалық дағдыларын қалыптастыруға және жұмыспен қамту деңгейін арттыруға бағытталған.
Қатысушылар бариста, аспаз, шаштараз және мобилограф сияқты сұранысқа ие мамандықтар бойынша қысқа мерзімді курстардан өтеді.
Өткен жылдың қорытындысы бойынша 120-дан астам жасөспірім оқытудан өтті. Қатысушылардың едәуір бөлігі курстарды аяқтап, жұмысқа орналасу мүмкіндігіне ие болды.
Биылғы жылы жоба оқыту бағыттарын кеңейтіп, қатысушылар санын арттыра отырып, жұмысын жалғастырады. Жұмысқа орналасу, жоғары оқу орындары мен колледждерге түсу кезеңдерінде сүйемелдеу, сондай-ақ тәлімгерлер мен жұмыс берушілермен өзара іс-қимыл қарастырылған.
Басқармада бұл бастама жастар үшін тең мүмкіндіктер жасауға және қаладағы әлеуметтік қолдау жүйесін дамытуға бағытталғанын атап өтті.
Дереккөз: Almaty.tv