Қалалық қоғамдық денсаулық сақтау басқармасының басшысы Марат Пашимов Қалалық кардиология орталығына барып, жүргізіліп жатқан жаңғырту нәтижелерімен танысып, жөндеуден өткен кардиология бөлімшесінің ашылуына қатысты, деп хабарлайды Almaty.news ақпарат агенттігі.
Қалалық кардиология орталығы – жүрек-қан тамырлары аурулары бар науқастарға мамандандырылған көмек көрсететін қаланың жетекші медициналық ұйымдарының бірі. Орталықтың ғимараттары өткен ғасырдың әр жылдары салынғандықтан, инфрақұрылымды жаңарту орталықтың дамуындағы маңызды кезең болды.
2025 жылдан бастап мұнда үй-жайларды кезең-кезеңімен жаңғырту жүргізілуде. Қазірдің өзінде кардиология бөлімшелері, кардиохирургия бөлімшесі, операциялық блок және рентгеноперациялық бөлмелер жаңартылды. Қазіргі уақытта кардиооңалту бөлімшесінде жұмыстар жалғасуда.
Жөндеуден кейін ашылған бөлімше науқастарды диагностикалау және бақылауға арналған заманауи жабдықтармен жабдықталған. Мұнда электрокардиография, эхокардиография, ЭКГ мен артериялық қысымды тәуліктік мониторингілеу, жүктеме сынақтары және басқа да зерттеулер қолжетімді.
«Қаланың медициналық ұйымдарын дәйекті түрде жаңғырту, ең алдымен, медициналық көмек сапасын арттыруға және пациенттер үшін қолайлы жағдай жасауға бағытталған. Қалалық кардиология орталығын жаңарту осы жұмыстың маңызды бөлігі болып табылады», — деп атап өтті Қалалық қоғамдық денсаулық сақтау басқармасының басшысы Марат Пашимов.
Қалалық кардиология орталығы отандық кардиологияның үздік дәстүрлерін сақтай отырып және медициналық көмек көрсетудің заманауи стандарттарын енгізе отырып, дәйекті жаңғыртуды жалғастыруда.
Дереккөз: Almaty.tv