Алакөл көлінде демалып жүрген төрт адам, оның ішінде шетелдіктер де бар, қатты жел мен толқын салдарынан суға кетуден аман қалды, деп хабарлайды Almaty.news ақпарат агенттігі.
ТЖМ мәліметінше, құтқарушылар полиция қызметкерімен бірге сапбордта көлге ағып кеткен төрт демалысушыға көмек көрсеткен. Оқиға туралы хабарлама Алакөл ауданындағы Көктұма ауылына жақын орналасқан Есқара учаскесінен түскен. Құтқарушылар демалысушыларды жағадан 1,5 шақырым қашықтықта тауып, су көлігімен құрлыққа жеткізген.
«Барлық төрт құтқарылған адам медициналық көмекке мұқтаж болмады», — деп мәлімдеді ТЖМ.
ІІМ болса оқиғаны толығырақ баяндады. Ведомствоның хабарлауынша, Көктұма ауылында ауа райының күрт нашарлауынан қатты жел мен биік толқындар судағы демалысушыларға қауіп төндірген.
«Полиция майоры Жақсылық Сәрсенов жағадан шамамен 500 метр қашықтықта сапбордтағы төрт адамды байқаған. Оның екеуі өздігінен жағаға жетуге тырысқан, бірақ қолайсыз ауа райына байланысты қауіпті жағдайда қалған. Полицей Көктұма ауылының тұрғынымен бірге көмекке ұмтылған. Алдымен олар Ресей Федерациясының Магадан қаласынан келген туристі құтқарып, жағаға аман-есен жеткізген. Содан кейін оның құтқару кеудешесін пайдаланып, екінші әйелге барып, оны да қауіпсіз жерге шығарған», — деп хабарлады ІІМ.
Құтқарылғандардың айтуынша, суда тағы бір 30 жастағы әйел қалған, ол жүзуді білмеген және құтқару кеудешесінсіз болған. Сонымен қатар, көлде Алматы қаласынан келген тағы екі демалысушы қалған.
«112 қызметіне хабарласқаннан кейін құтқарушылардың келуі белгілі бір уақытты қажет ететіні белгілі болды. Осыған байланысты полиция майоры Жақсылық Сәрсенов пен Көктұма ауылының тұрғыны құтқарушылар келгенше әйелге құтқару кеудешесін жеткізіп, оның су бетінде қалуына көмектесіп, ықтимал қайғылы оқиғаның алдын алды», — деп атап өтті ІІМ.
Дереккөз: Nur.kz