Алматы әкімі Дархан Сатыбалды Түрксіб ауданына жұмыс сапарымен барып, Ақан Сері көшесінің жөнделуін және Сейфуллин атындағы саябақтың абаттандырылуын тексерді, деп хабарлайды Almaty.news ақпарат агенттігі.
Түрксіб ауданында қала инфрақұрылымын жаңарту жұмыстары жалғасуда. Жұмыс сапары аясында қала әкімі Дархан Сатыбалды Ақан Сері көшесінің Сейфуллин даңғылынан Шолохов көшесіне дейінгі 3,3 км учаскедегі жөндеу барысын тексерді. Мұнда жол төсемі жаңартылып, «қалқымалы» люктер орнатылып, техникалық тротуар жабдықталуда. Жаяу жүргіншілер инфрақұрылымын дамытуға және аялдама алаңдарын ұйымдастыруға ерекше көңіл бөлінуде. Жұмыстарды ағымдағы айдың соңына дейін аяқтау жоспарланған.
Жалпы қала бойынша орташа жөндеумен 360 көшені, оның ішінде 19 магистральдық көшені қамту жоспарланып отыр, жалпы ұзындығы шамамен 270 км.
Сондай-ақ әкім бизнестің әлеуметтік жауапкершілігі аясында жүзеге асырылған Сейфуллин атындағы саябақтың абаттандырылуымен танысты. Саябақта жаяу жүргіншілер аймақтары, спорттық және балалар алаңдары жаңартылып, жаңа көгалдандыру жұмыстары жүргізілді.
Сапар барысында аудан тұрғындары аулалардың жай-күйі, инженерлік желілер және қоғамдық көлік жұмысына қатысты мәселелерді көтерді. Барлық өтініштер одан әрі пысықтау үшін профильді қызметтерге берілді.
Дереккөз: Inalmaty.kz