Қазақстандық теннисші Михаил Кукушкин Алматыда өтіп жатқан ATP 250 санатындағы Almaty Open турнирінің бірінші айналымында жеңіске жетті, деп хабарлайды Almaty.news ақпарат агенттігі.
Әлемдік рейтингте 389-орында тұрған спортшыға ұйымдастырушылар арнайы шақырту (wild card) берген. Бірінші кезеңде оның қарсыласы іріктеу кезеңінен өтіп, негізгі торға енген, әлемнің 133-ракеткасы грек теннисшісі Стефанос Сакелларидис болды.
Кездесу екі сетке ғана созылып, әр сет тай-брейкпен аяқталды. Кукушкин 7:6 (7:4), 7:6 (7:3) есебімен жеңіске жетті.
Теннисші кортта 2 сағат 13 минут өткізді. Осы уақыт ішінде қазақстандық бір эйс жасап, бір қосарланған қателік жіберді және жеті брейк-пойнттың үшеуін пайдаланды.
Екінші айналымда Кукушкин грек теннисшісі Стефанос Циципас (жетінші себеттегі) пен америкалық Александр Ковачевич арасындағы матчтың жеңімпазымен кездеседі.
Almaty Open — қазақстандық теннисші үшін қоштасу турнирі. Ол бұған дейін кәсіби мансабын аяқтайтынын жариялаған болатын.