Жеке секторды газбен жабдықтауға көшіру жобасы Алматы қаласының әкімдігімен бірлесіп іске асырылады. Алғашқы кезеңде тараптардың өзара іс-қимылының негізгі бағыттарын айқындайтын меморандумға ресми қол қойылды, деп хабарлайды Almaty.news ақпарат агенттігі.
Жеке үйлерді қосуға бірыңғай тәсіл аясында әкімдік нысандарға тексеру жүргізіп, тұрғындарға кеңес береді, содан кейін білікті мердігер ұйымдар қажетті құрылыс-монтаж жұмыстарын орындайды. Бұл ретте тұрғындарға газбен жылытуға көшуге жан-жақты көмек көрсетіледі, оның ішінде қаржылық және ұйымдастырушылық мәселелерді шешу, қажетті құжаттарды ресімдеу және өзге де қолдау шаралары қамтылады.
Жеке үйлерді көмірден табиғи газға ауыстыру Алматыдағы ауа сапасын жақсарту үшін де маңызды. Жылыту кезеңінде жеке секторда қатты отынды пайдалану ластаушы шығарындылар көздерінің бірі болып қала береді.
Бұл Болат Өтемұратов қорының Алматыдағы алғашқы жобасы емес. Қалада Қор Ботаникалық бақты қайта жаңартуды, сондай-ақ ҚР Ұлттық орталық музейінің желдету және кондиционерлеу жүйесін жаңғыртуды қолдады. Сондай-ақ Алматыда Қордың «Аутизм. Әлем бәрімізге ортақ» бағдарламасы аясында ашқан алғашқы «Асыл Мирас» аутизм-орталықтарының бірі жұмыс істейді. COVID-19 пандемиясы кезеңінде Қор денсаулық сақтау жүйесіне, оның ішінде ПТР-тестілеу үшін мобильді зертханалар орнату арқылы қолдау көрсетті.
12 жыл ішінде Қор елдің әртүрлі өңірлерінде әлеуметтік жобаларды жүзеге асырды, оның ішінде Есік пен Қосшыда мектептер салу, Қызылордада әуежайдың жаңа терминалын және Қосшыда комьюнити-орталықты, Жезқазғанда «Шабыт» балалар мен жасөспірімдер шығармашылық орталығын салу, сондай-ақ білім беру, денсаулық сақтау, инклюзия, мәдениет, экология және табиғи апаттардан зардап шеккендерді қолдау салаларындағы басқа да бастамаларды қамтыды. Қордың 2014 жылдан бері әлеуметтік жобаларға салған жалпы инвестициясы 250 млн доллардан асады.