Алматы тауларында құтқарушылар Біріккен Араб Әмірліктерінің азаматына көмекке келді — шетелдік турист денсаулығына байланысты таудан өздігінен түсе алмаған, деп хабарлайды Almaty.news ақпарат агенттігі.
Кеше кешке Үлкен Алматы шатқалы ауданында шетелдік туристің таудан өздігінен түсе алмай жатқаны туралы хабарлама түскен. Оқиға орнына Алматы қаласы ТЖД Құтқару қызметінің құтқарушылары дереу жолға шықты.
„Көрсетілген ауданға келген құтқарушылар 1981 жылы туған БАӘ азаматын тапты. Алдын ала мәлімет бойынша, аяқтары құрысуға шалдыққандықтан, ол таудан өздігінен түсе алмаған. ТЖМ қызметкерлері оған жедел көмек көрсетіп, төмен түсіріп шықты“, — деп хабарлады құтқарушылар.
Турист медициналық көмекке мұқтаж болмады.
ТЖМ таулы жерге шығарда физикалық дайындықты ескеру, су, байланыс құралдары және қажет болған жағдайда дәрі-дәрмек алу маңызды екенін еске салады.
Дереккөз: Nur.kz