Алматыдағы саябақтарда демалып, балалармен көңілді уақыт өткізіп жүргенде, сақтықты жоғалтпау керек. Редакция мамандармен бірге мақта кәмпиттің ерекшеліктерін зерттеп, бұл таяқшадағы тәттінің әдемі пішінінің артында денсаулыққа қандай қауіп жасырынғанын анықтады, деп хабарлайды Almaty.news ақпарат агенттігі.
Алматы қаласы Санитариялық-эпидемиологиялық бақылау департаментінің (СЭБД) мамандары сатып алар алдында нені ескеру керектігін түсіндірді.
СЭБД басшысының санитариялық-гигиеналық мәселелер жөніндегі орынбасары Гауһар Қаткенованың айтуынша, мақта кәмпит пен басқа да көше тағамдарын сатуға санитариялық талаптар мен техникалық регламенттер қатаң сақталған жағдайда ғана рұқсат етіледі. Өнімнің қауіпсіздігі оны дайындау, сақтау және сату шарттарына тікелей байланысты.
Қолданыстағы санитариялық нормалар бойынша, мақта кәмпит дайындау және сату нүктелері жергілікті атқарушы органдармен келісілген арнайы бөлінген орындарда ғана орналасуы мүмкін. Олар қоқыс контейнерлері, дәретханалар немесе қарқынды қозғалысы бар жолдар сияқты ластану көздерінің жанында болмауы керек.
Тазалыққа ерекше көңіл бөлінеді. Сауда нүктесінің айналасындағы аумақ таза ұсталуы, жабдықтар үнемі жуылып, дезинфекциялануы, ал барлық беттер тағаммен жанасуға қауіпсіз материалдардан жасалуы тиіс. Қант пен басқа ингредиенттер шаң, ылғал және жәндіктердің түсуін болдырмайтын жабық және таза ыдыста сақталуы керек.
Егер стационарлық нүктелер туралы айтатын болсақ, олар әдетте орталықтандырылған сумен жабдықтау және кәріз жүйесіне қосылуы тиіс. Алайда маусымдық көше саудасы үшін балама шешімдерге – мысалы, әкелінетін ауыз су мен антисептиктерді пайдалануға рұқсат етіледі.
Негізгі талап – сатушының жеке гигиенасын сақтау. Қызметкер үнемі қолын жуып, өңдеп, таза санитариялық киім киюі, қажет болғанда қолғап пайдалануы міндетті. Өнімге лас қолмен тию немесе жұқпалы аурулар болған кезде жұмыс істеуге қатаң тыйым салынады.
Мақта кәмпит дайындауға арналған аппараттар жұмыс күнінің соңында ғана емес, жұмыс барысында да – әр 3-4 сағат сайын тазалануы керек. Себебі қант тез карамельденіп, қабат түзеді, бұл өнімнің сапасын нашарлатып, микроорганизмдердің көбеюіне орта жасауы мүмкін.
Дәмдер немесе бояғыштар ауыстырылған кезде ингредиенттердің араласуын болдырмау үшін жабдықты қосымша тазалау қажет.
Мақта кәмпит өндірісінде бояғыштарды пайдалануға рұқсат етіледі, бірақ олар сертификатталған тағамдық қоспалар болуы шарт. Бұл табиғи заттар (мысалы, куркумин немесе антоциандар) немесе рұқсат етілген синтетикалық бояғыштар болуы мүмкін.
Тым ашық, «қышқыл» түс өздігінен тікелей бұзушылық болып табылмайды, бірақ рұқсат етілген дозалардың асып кетуін немесе сапасыз қоспалардың қолданылуын көрсетуі мүмкін, – деп қосты дәрігер.
СЭБД мамандары көшеде мақта кәмпит сатып алудың негізгі қауіптері санитариялық нормалардың бұзылуымен байланысты екенін атап өтті. Мұндай жағдайда өнім гигиенаның бұзылуынан бастап қоршаған ортаның әсеріне дейінгі факторлардың жиынтығынан қауіпсіздігін жоғалтуы мүмкін.
Мамандар негізгі қауіптерді атады: сатушының жеке гигиенасын сақтамау, соның ішінде ақша мен өнімге тию кезінде микробтық ластану;
Балаларға арналған мақта кәмпит сатып алуда ерекше сақтық таныту керек. Дәрігерлердің айтуынша, бала ағзасы тағам сапасы мен қоспаларға сезімтал. Тіпті шамалы бұзушылықтар аллергиялық реакцияларға немесе ас қорытудың бұзылуына әкелуі мүмкін. Сонымен қатар, қантты шамадан тыс тұтыну тіс жегісінің даму қаупін арттырып, зат алмасуға теріс әсер етеді.
Дереккөз: Zakon.kz