Алматыдағы табиғи өрт маусымына дайындық аясында құтқарушылар Іле-Алатау ұлттық табиғи паркінің аумағында орналасқан Сарқырама шатқалында оқу-жаттығу өткізді. Сценарий бойынша, жергілікті жерде ірі орман өрті шығып, күшті желдің салдарынан от беткеймен жоғары қарай жылдам таралып, батыс бағытқа ауысқан. , деп хабарлайды Almaty.news ақпарат агенттігі.
Тактикалық сценарийге сәйкес, қауіп аймағына шатқалдың жоғарғы бөлігіндегі демалыс тобы, Қазселденқорғау ғимараты, «Медеу» биік таулы спорт кешені және Іле-Алатау ұлттық паркінің орман алқаптары кірді. Алғашқы болып шартты өртті «Қазавиаорманқорғау» ұшқыш-бақылаушысы әуе мониторингі кезінде анықтап, координаттар мен өрт туралы мәліметтерді радиодиспетчерлік қызметтің диспетчеріне берген. Одан кейін ақпарат Алматы Төтенше жағдайлар департаментіне жедел жеткізілді.
Оқиға нақты жағдайға барынша жақын алгоритм бойынша дамыды. Қызметтерге хабарлама жіберіліп, шартты өрт орнына азаматтық қорғау күштері, арнайы техника және «Қазавиақұтқару» авиациясы шықты. Алғашқы болып Медеу филиалының қызметкерлері келді. Жағдайды бағалау және аумақты тексеру үшін атты патрульдер жұмылдырылды – таулы рельефте бұл қол жетпейтін учаскелерге жетудің ең тиімді тәсілдерінің бірі.
Бір мезгілде шартты табиғи өртті жою бойынша жедел штаб құрылып, ол Сарқырама шатқалының етегінде орналасты. Осы жерден тартылған қызметтер мен бөлімшелердің іс-қимылы үйлестірілді. Құтқарушылар мұндай жаттығулардың Алматы үшін өте өзекті екенін атап өтті, өйткені қала таулар мен орман массивтерімен іргелес орналасқан. Ыстық маусымда табиғи өрт қаупі артады, ал күшті жел мен күрделі рельеф өртті сөндіруді айтарлықтай қиындатады. Мұндай жағдайда есеп кейде сағаттарға емес, минуттарға жүреді.
Құтқарушылардың пікірінше, бұл оқу-жаттығу ірі тау-орман өрті кезінде тек техника ғана емес, қызметтердің нақты өзара іс-қимылы, өрт ошағын уақтылы анықтау және шешімдерді жылдам қабылдау маңызды рөл атқаратынын көрсетті. Дәл осындай сценарийлер жүйенің дайындығын алдын ала тексеруге және нақты төтенше жағдайда тәуекелдерді азайтуға мүмкіндік береді.
Дереккөз: Zakon.kz