Алматы қаласында мамыр айының басынан бастап субұрқақтар кезең-кезеңмен іске қосылады. Қала әкімдігінің мәліметінше, олар 1 қазанға дейін күн сайын сағат 08:00-ден 23:00-ге дейін жұмыс істейді. Ауа райы жағдайларына байланысты субұрқақтардың жұмысы реттеліп отырады: температура +5°C-тан төмендеген жағдайда олар уақытша тоқтатылады.
Биылғы жоспарлар
Қоғамдық кеңістіктерді дамыту басқармасы өкілдерінің айтуынша, бұл жылы коммуналдық меншіктегі 55 субұрқақ кешенін іске қосу жоспарланып отыр. Барлық нысандардың техникалық және санитарлық жағдайы тиісті қызметтердің тұрақты бақылауында болады.
Маусымға дайындық
Маусымға дайындық жұмыстары алдын ала жүргізілді. Мамандар субұрқақтардың тостағандарын және айналасындағы аумақтарды тазалап, суды залалсыздандырды, жабдықтарды жөндеп, сырлап, инженерлік жүйелерге толық тексеріс жасады. Бұл олардың маусым бойы сенімді әрі қауіпсіз жұмыс істеуін қамтамасыз етеді.
Бұрынғы жобалар туралы
Еске салайық, бұған дейін Алматыда 5,6 млрд теңгеге жөнделіп жатқан 4 субұрқақ туралы жазылған. Олар Алматы әкімдігі ғимаратының шығыс және батыс жағында, Республика алаңында, сондай-ақ Ғ.Мүсірепов театры жанында орналасқан. Жаңартылған мәліметте Алматы әкімдігі аталған жобаларды аяқтау және іргелес аумақтарды көркейту 2026 жылы үшінші тоқсанға жоспарланғанын атап өтті.