Алматыда №16 қалалық емхананың сейсмикалық нығайту жұмыстары жүргізілуде. 1977 жылдан бері жұмыс істеп келе жатқан нысанды қайта жаңғырту жоспарға сай жүріп жатыр, деп хабарлайды Almaty.news ақпарат агенттігі.
Жоба үш функционалды блокты қамтиды: негізгі төрт қабатты ғимарат, зертханалық корпус және үш қабатты «Б» блогы. Жаңғыртылатын үй-жайлардың жалпы ауданы 5 мың шаршы метрден асады.
Жоба аясында көтергіш конструкциялар кешенді түрде нығайтылды, бұл ғимараттардың сейсмикалық жүктемелерге төзімділігін айтарлықтай арттырады. Сонымен қатар жылу, сумен жабдықтау, желдету және электрмен жабдықтау жүйелері жаңартылды. Ішкі үй-жайлар заманауи медициналық стандарттарға сәйкес келтіріліп, аз қозғалатын топтар үшін қолжетімді орта құрылуда.
Медициналық мекемеге 63 мыңнан астам адам бекітілген. Жобаның ерекшелігі — қайта жаңғырту жұмыстары емхана жұмысын тоқтатпай жүргізілуде. Кезеңдік құрылыс ұйымдастырудың арқасында емхана Әуезов ауданы тұрғындарын жаңғырту кезеңінде де қабылдауды жалғастырды.
«Негізгі міндет тек конструкцияларды нығайту ғана емес, сапалы медициналық қызмет көрсету үшін заманауи әрі жайлы кеңістік құру болды. Қазіргі уақытта нысанда әрлеу жұмыстары аяқталып, ғимаратты пайдалануға беру алдында инженерлік жүйелерге кешенді тексеру жүргізілуде. Қайта жаңғыртуды ағымдағы жылдың күзінде аяқтау жоспарланған», — деп хабарлады Алматы қаласы Құрылыс басқармасы.
Дереккөз: Almaty.tv