Алматы әкімдігі қоғамдық кеңістіктерді жаңғырту, жасыл қорды дамыту және қауіпсіз әрі қолжетімді қалалық орта құру бағытында жүйелі жұмыс жүргізіп жатыр. Өткен жылы Сайран су қоймасының маңындағы 47 гектардан астам аумақ абаттандырылып, 2,5 шақырымға созылған серуендеу аймағы, жағажай, балалар мен спорт алаңдары, вело- және скейт-парктер пайда болды. Сондай-ақ 3 000-нан астам ағаш пен 14 000-ға жуық бұта отырғызылды, деп хабарлайды Almaty.news ақпарат агенттігі.
20 жылдан астам уақыттан кейін Терренкур толық жаңартылды. 4 гектардан астам аумақта жайлы жаяу жүргіншілер жолдары, балалар ойын алаңдары, амфитеатр және воркаут аймақтары салынды. Қоғамдық кеңістіктерді дамыту басқармасының жоба бөлімінің басшысы Ұлан Ұайс: «Әкімнің тапсырмаларын орындау абаттандырудың кешенді моделін құруға, бірыңғай стандарттарды енгізуге және қаланың тұтас сәулеттік-ландшафтық келбетін қалыптастыруға мүмкіндік берді», — деді.
«Жүргізіліп жатқан жұмыс қалалық ортаның сапасын айтарлықтай арттырып отыр», — деп қосты ол.
Алматыда төрт субұрқақ кешені күрделі жөндеуден өтіп, ғимараттардың қасбеттері жаңартылуда. Әсіресе өткен ғасырдың ортасында салынған нысандарға басымдық берілген. Алмалы ауданында биыл 60 көпқабатты үйдің қасбетін бірыңғай стильде безендіру жоспарланған. Сәулетші Евгений Цой: «Алматы бұл бағытта алғашқы емес, тарихи орталығы бар ірі қалалардың бәрінде мұндай бағдарламалар бар. Мен тек қолдаймын», — деді.
Өткен жылы Назарбаев даңғылының батысы мен Ганди көшесінің солтүстігінде 4 гектардан астам аумақты алып жатқан жаңа саябақ ашылды. Мұнда 10 000 шаршы метр жаяу жүргіншілер жолы, автоматты суару жүйесі, экологиялық қауіпсіз материалдар пайдаланылған. Жасанды тоған қыста коньки тебуге жарамды. 400-ден астам ағаш отырғызылған. Сонымен қатар, Бауман тоғайы, Есентай өзенінің жағалауы, Геологтар аллеясы, «Оңтүстік» саябағы, Достық және Пушкин көшелерін абаттандыру жобалары аяқталуға жақын. Тұңғыш Президент саябағы да реконструкциялануда. Әкім Дархан Сатыбалдының тапсырмасымен «Жасыл Алматы» мекемесі мен Урбанистика орталығы құрылып, қоғамдық кеңістіктерді күтіп-ұстау, көгалдандыру сапасын арттыру және жобалардың дизайн-кодқа сәйкестігін бақылау жүктелген.
Дереккөз: Almaty.tv