Жасанды интеллект медицинада дәрігерлер мен зерттеушілер үшін күнделікті жұмыс құралына айналып, ауруларды ерте анықтау мен емдеу әдістерін іріктеуде қолданылуда. Алайда мамандар бұл технологиялардың қауіпсіздігі мен мүмкіндіктеріне ерекше назар аударуда, деп хабарлайды Almaty.news ақпарат агенттігі.
Осы және өзге де мәселелер халықаралық «ANaMed Forum — New Generation 2026» форумында талқылануда. Іс-шара биыл үшінші рет өтіп, «AI-Driven Personalization: Medicine & Education» тақырыбына арналған. Форумды С.Ж.Асфендияров атындағы ҚазҰМУ ұйымдастырып отыр. 2023 жылмен салыстырғанда қатысушылар саны бір жарым есеге артып, 1550 маман жиналды. Олар 23 елден келген ғалымдар, дәрігерлер мен жас мамандар. 21-22 мамыр күндері олар тәжірибе алмасып, диагностика, телемедицина және басқа салалардағы технологиялық шешімдерді талқылайды.
«Жасанды интеллект болашақтың технологиясы болудан қалып, заманауи медицинаның жұмыс құралына айналды», — деп атап өтті Қазақстанның денсаулық сақтау министрі Ақмарал Әлназарова.
Министрдің айтуынша, AI құралдары диагностика, радиология, онкология, кардиология, қоғамдық денсаулық сақтау және медициналық білім беру салаларында қолданылып, үлкен деректерді талдауға, ауруларды ерте анықтауға, тәуекелдерді бағалауға және болашақ дәрігерлерге жеке білім траекториясын құруға көмектеседі. ДДҰ мәліметінше, 2026 жылы Еуропалық Одақ елдерінің төрттен үш бөлігі диагностикада AI құралдарын қолданады. Радиологияда AI алгоритмдері суреттерді талдап, ауруларды ерте сатыда анықтауға көмектеседі.
Дереккөз: Nur.kz