Алматы қаласы Полиция департаменті Соңғы қоңырау мерекесі қарсаңында мектеп түлектерінің ата-аналары мен мұғалімдеріне ресми үндеу жасады. Тәртіп сақшылары қайғылы оқиғалардың алдын алу үшін ересектерді жасөспірімдердің бақылауын күшейтуге шақырды, деп хабарлайды Almaty.news ақпарат агенттігі.
Алматы қаласы ПД қоғамдық қауіпсіздік басқармасының бастығы Тимур Ноғайбаевтың айтуынша, мереке күндері мегаполистің полициясы күшейтілген жұмыс режиміне көшеді. Патрульдік нарядтар кәмелетке толмағандар арасындағы құқық бұзушылықтардың алдын алуға және олардың жеке қауіпсіздігін қамтамасыз етуге ерекше назар аударады.
«Біз жыл сайын мерекелік іс-шаралардың бақылаудан шығып кететін жағдайларына тап боламыз. Бұл қала сыртындағы коттедждерді жалдау, алкогольдік ішімдіктер ішу, қауіпті автомобиль сапарлары және «түлек кортеждерін» ұйымдастыру туралы болып отыр. Жасөспірімдер әлеуметтік желілерге әсерлі бейнежазбалар түсіру үшін жол қозғалысы ережелерін өрескел бұзған кезде, бұл трагедиямен аяқталуы мүмкін. Ата-аналар мен мұғалімдердің белсенді қатысуынсыз қауіпсіздікті толық қамтамасыз ету мүмкін емес», — деп атап өтті Тимур Ноғайбаев.
Ведомство ата-аналардан түлектерді қараусыз қалдырмауды, оларға көлік руліне отыруға немесе қауіпті автоколонналарға қатысуға тыйым салуды, сондай-ақ барлық мереке күндері балалармен тұрақты телефон байланысында болуды сұрады. Полицейлер басты мақсат — балалардың өмірі мен денсаулығын сақтау үшін күш біріктіруге шақырады.
Дереккөз: Almaty.tv