Танымал блогер әрі кәсіпкер Сауле Базархан Алматыдағы жеке клиникада пластикалық операция кезінде қайтыс болды, деп хабарлайды Almaty.news ақпарат агенттігі.
Қайғылы оқиға 2026 жылы 15 мамырда Алматыдағы жеке клиникалардың бірінде болды. Қайтыс болған 53 жастағы әйел жергілікті анестезиямен жоспарлы липосакция процедурасына түскен. Туыстарының айтуынша, операция шамамен бір жарым сағатқа созылуы керек еді, бірақ бірнеше сағат өтсе де, пациенттің жағдайы туралы хабарламаған.
— Анамның жоқ екенін бізге шамамен сағат 18:00-де ғана айтты. Ал жедел жәрдем тек сағат 19:00-де келді. Үш сағат. Үш сағат бойы ол жабық есіктің артында жалғыз болды. Ал біз білмедік. Әлі де сұрақ көп: неге дәрігерлер өлім туралы бірден хабарламады? — деп жазды оның қызы.
Туыстары клиниканың қайғылы оқиғадан бірнеше күн өткен соң да жаңа клиенттерді операцияға жазып жатқанына наразылық білдірді. Олар әділ тергеу жүргізіп, клиниканың қызметін толық анықталғанша тоқтатуды сұрайды.
Алматы полиция департаменті бұл ақпаратқа түсініктеме берді.
— 15 мамырда жеке клиникалардың бірінде Алматының 53 жастағы тұрғыны қайтыс болды. Осы факті бойынша Бостандық аудандық полиция басқармасы қылмыстық іс қозғады, — деп хабарлады Алматы ПД баспасөз қызметі.
Сотқа дейінгі тергеу аясында қажетті шаралар кешені жүргізіліп, нәтижесінде түпкілікті процессуалдық шешім қабылданады. Полиция ҚР ҚПК 201-бабына сәйкес тергеудің басқа деректері жарияланбайтынын атап өтті.
Сауле Базархан әлеуметтік желілердегі белсенділігімен және кәсіпкерлік жобаларымен танымал болған. Одан балалары мен немерелері қалды.
Дереккөз: Inform.kz