Алматыда демалыс күнгі жәрмеңкелер желісі кеңейіп жатыр. 16 мамырдан бастап Жетісу ауданындағы Құлагер шағын ауданында жаңа сауда алаңы жұмыс істей бастайды, деп хабарлайды Almaty.news ақпарат агенттігі.
Қалалық әкімдіктің баспасөз қызметінің мәліметінше, жаңа жәрмеңке азық-түлік тауарларының, оның ішінде әлеуметтік маңызы бар өнімдердің қолжетімділігін арттыруға және қаладағы жәрмеңке саудасының географиясын кеңейтуге бағытталған.
Алаңда Алматы қаласы мен Алматы облысының өндірушілері, оның ішінде Еңбекшіқазақ, Талғар, Іле, Қарасай және Жамбыл аудандарының ауыл шаруашылығы тауарын өндірушілерінің өнімдері ұсынылады. Сондай-ақ Шығыс Қазақстан облысының өндірушілері де қатысады. Ассортимент мыңнан астам атауды қамтиды.
«Алматы» ӘКК деректері бойынша, 2026 жылдың басынан бері жәрмеңкелерде 8,5 мың тоннаға жуық азық-түлік өнімі, оның ішінде әлеуметтік маңызы бар тауарлар сатылды.
Қазіргі уақытта екі жәрмеңке алаңын – Бостандық ауданындағы (Қазақфильм шағын ауданы) және Әуезов ауданындағы (Үтеген батыр көшесі – Абай даңғылы) нысандарды кезең-кезеңімен жаңғырту жүргізілуде. Жоба сауда жағдайын жақсартуға және нысандарды қазіргі санитарлық және инфрақұрылымдық талаптарға сәйкестендіруге бағытталған.
Болашақта Алматының барлық сегіз ауданын жәрмеңкелермен кезең-кезеңімен қамту жоспарлануда. Демалыс күнгі жәрмеңкелер сенбі және жексенбі күндері сағат 9:00-ден 18:00-ге дейін, оның ішінде Құлагер шағын ауданындағы жаңа алаңда жұмыс істейді.
Дереккөз: Inalmaty.kz