Алматының ірі шағын аудандарының біріне жақсы жаңалық жетті. Енді тұрғындар демалыс күндері өтетін жәрмеңкелерден өнім сатып ала алады, деп хабарлайды Almaty.news ақпарат агенттігі.
Жәрмеңкелерде Алматы қаласы мен Алматы облысының – Еңбекшіқазақ, Талғар, Іле, Қарасай және Жамбыл аудандарының өндірушілері мен ауыл шаруашылығы тауарын өндірушілерінің өнімдері ұсынылады. Сондай-ақ Шығыс Қазақстан облысының өндірушілері де қатысады. Ассортимент 1000-нан астам өнім атауын қамтиды.
«Демалыс күнгі жәрмеңкелер» әр сенбі және жексенбі күндері сағат 09:00-ден 18:00-ге дейін келесі мекенжайлар бойынша өтеді:
- Бостандық ауданы – Қазақфильм шағын ауданы;
- Әуезов ауданы – Рысқұлбеков көшесі, 33/2;
- Медеу ауданы – Мендіқұлов пен Бектұров көшелерінің қиылысы;
- Алмалы ауданы – Масанчи көшесі, Айтеке би мен Гоголь көшелерінің аралығы;
- Жетісу ауданы – Құлагер шағын ауданы.
Бұған дейін тағы бір жақсы жаңалық хабарланған болатын. 2026 жылғы 1-15 маусым аралығында Алматыда «Алматы Жастары» бағдарламасы аясында жастарға арналған жеңілдетілген тұрғын үй қарыздарын алуға өтініштер мен құжаттар қабылдау басталады.
Дереккөз: Zakon.kz