Алматы қаласының төменгі бөлігіндегі Kokjiek Garden саябағында Есентай өзенінің тасуы салдарынан жаяу жүргіншілер жолының бір бөлігі қирады, деп хабарлайды Almaty.news ақпарат агенттігі.
Әлеуметтік желілерде брусчатканың бір бөлігі топырақпен бірге өзен арнасына құлаған видео тарады.
Қала әкімдігінің түсіндіруінше, 10 мамырда судың мол ағыны мен Есентай өзенінің деңгейінің көтерілуі салдарынан су тасып, жаяу жүргіншілер инфрақұрылымының элементтері ішінара зақымданған.
— Су басудың салдарын жедел жою үшін мердігер «Sunshine» ҚБ гидротехникалық шлюзді және арнаны шөгінділерден, қоқыстан және су өтуіне кедергі келтіретін жинақтардан тазарту жұмыстарын жүргізді. Қабылданған шаралар жағдайды тұрақтандыруға және судың кедергісіз ағуын қамтамасыз етуге мүмкіндік берді, — деп атап өтті ведомствода.
Қазіргі уақытта 2024 жылы «Kokjiek Garden» саябақ аймағын күрделі жөндеу жобасы бойынша жұмыс жүргізген «Еңбек» ЖШС мердігер ұйымына кепілдік міндеттемелер аясында қалпына келтіру жұмыстарын жүргізу қажеттігі туралы талап-шағым хаты дайындалды.
Бұған дейін Алматы облысының Ақтоғай ауылында Самал көшесінде жол төсемінің опырылуы болған еді.
Дереккөз: Inform.kz