Алматыдағы пәтер жалдау бағасы негізінен жалпы сұранысқа байланысты қалыптасады, тек студенттерге ғана емес, деп мәлімдеді Қазақстан риелторлар қауымдастығы президентінің кеңесшісі Нина Лукьяненко, деп хабарлайды Almaty.news ақпарат агенттігі.
Мамыр айының соңында Алматыда студенттер жазда пәтерлерін босататындықтан, олар тарапынан тұрғын үйді жалға алу сұранысы дәстүрлі түрде төмендейді. Алайда сарапшының пікірінше, бұл фактор жалдау нарығындағы жалпы баға деңгейіне айтарлықтай әсер етпейді.
— Жалдау нарығы әрқашан маусымдық нарық. Эконом-сегмент туралы айтатын болсақ, маусымдылық студенттердің келуімен және арзан пәтер нұсқаларын іздеуімен көрінеді. Жалпы, Алматыдағы жалдау нарығы инвестициялық сипатқа ие: адамдар жылжымайтын мүлікті кейін жалға беру және қандай да бір табыс алу мақсатында сатып алады, — деді ол Алматы РСК брифингінде.
Сарапшының айтуынша, студенттік фактор арзан жалдау сегментіне шынымен әсер етеді, бірақ бағаның жалпы динамикасын анықтамайды. Нарыққа негізгі қысымды көші-қон ағындары, сондай-ақ туристер мен бизнес белсенділігі жасайды.
— Студенттер баға белгілеудің негізгі факторы емес, сондықтан біз бұл жағдайда жалдау мөлшерлемелерінің төмендеуін күте алмаймыз. Алматы мен Астана — әртүрлі халық келетін аймақтар. Үлкен қалаларға адамдар тек оқу үшін ғана емес, жұмыс іздеу, өмір сүруге жақсы орын, жақсы экономикалық жағдай іздеп келеді. Бұған елді көруге келетін туристерді қосуға болады, — деді Нина Лукьяненко.
Сарапшы көптеген елдерде студенттерді жатақханалармен қамтамасыз ету мәселесі студенттік қалашықтар салу және жеке инвесторларды тарту арқылы шешілетінін атап өтті.
Қазақстанда да мемлекеттік қолдауы бар кәсіпкерлерге арналған белгілі бағдарламалар бар. Мұндай нысандарды салу ұзақ процесс болғандықтан, айтарлықтай өзгерістер тек алдағы бірнеше жылда ғана көрінеді.
Бұған дейін шетелдік студенттер Қазақстанға 22 млрд теңге әкелгені хабарланған еді.
Дереккөз: Inform.kz