Алматыдағы коттедж қалашығының тұрғындары қатты жаңбырдан кейін үйлері мен аулалары тұрақты түрде су астында қалатынын айтып, дабыл қақты. Олардың пікірінше, мұның себебі – көршілес құрылыс алаңында су бұру жүйесінің жоқтығы, деп хабарлайды Almaty.news ақпарат агенттігі.
Тұрғындар бірнеше жыл бойы құрылыс компаниясына жүгінгенімен, мәселе әлі шешілмеген. Соңғы нөсерден кейін тағы да су басу оқиғалары тіркелді. Жергілікті тұрғын Мұрат Қайдаровтың айтуынша, түнде су оның учаскесін басып, жертөле терезелері арқылы үйге кіре бастаған. Су терезенің жартысына дейін көтеріліп, жиһаз, қабырғалар және ішкі әрлеу зақымданған. Ол бұл мәселемен екінші жыл қатарынан күресіп жатқанын айтады.
Тағы бір тұрғын Алан Оразалинов те дәл осындай жағдайға тап болған. Ол жаңбыр кезінде су үйді қоршап, жертөлені басып қалатынын, ал тұрақты ылғалдан көпжылдық шыршалар мен басқа өсімдіктердің құри бастағанын хабарлады.
Тұрғындар су басудың себебі – көршілес элиталық тұрғын үй кешенінің құрылысы деп санайды. Олардың айтуынша, тіреу қабырғасы салынып, жер бедері өзгергеннен кейін су төмен қарай – тұрғын үйлерге қарай аға бастаған. Құрылыс екі жылдан астам уақыт жүріп жатыр. Жоба бойынша аумақта 74 коттедж және 12 таунхаус салу жоспарланған.
Алматылықтар құрылыс компаниясынан орталықтандырылған нөсер кәрізі жүйесін ұйымдастыруды және жер асты мен жаңбыр сулары мәселесін шешуді бірнеше рет сұраған, бірақ жұмыстар орындалмаған. Құрылыс компаниясы түсініктеме беруден бас тартты. Ал Бостандық ауданы әкімдігі нысанды мамандар тексеретінін және құрылыс нормаларының сақталуын бағалайтынын хабарлады.
Аудан әкімдігі өкілдерінің айтуынша, құрылыс алаңында әзірге арық желілері жоқ, алайда құрылыс салушы абаттандыру кезеңінде су бұру жүйесін қарастыруға уәде берген. Жұмыстар алдын ала маусым-шілде айларында орындалуы мүмкін.
Тұрғындар тұрақты су басудан және көпжылдық уәделерден шаршағандарын айтып, қазір сотқа ұжымдық шағым дайындап жатыр.
Дереккөз: Inalmaty.kz