Алматыда қалалық жоспарлау және урбанистика басқармасының бұрынғы басшысы Алмасхан Ахмеджанов пен басқа да бұрынғы лауазымды тұлғаларға қатысты қылмыстық істі қайта қарау басталды, деп хабарлайды Almaty.news ақпарат агенттігі.
Іс бойынша барлығы алты адам өтіп жатыр. 2025 жылғы ақпанда Алматы қаласының мамандандырылған ауданаралық соты оларды лауазымдық өкілеттіктерді теріс пайдаланды, пара алу және алаяқтыққа көмектесу деп таныған еді. Алмасхан Ахмеджанов 11 жылға бас бостандығынан айырылды. Қалалық жер қатынастары басқармасының бұрынғы басшысы Ардақ Самамбетов 10 жыл колонияға сотталды, жерге орналастыру, жерді алып қою және резервтеу бөлімінің бұрынғы басшысы Ерлан Жармұханбетов 14 жылға кесілді. Сондай-ақ бағалаушы компанияның директоры Алмазхан Бакиров 8 жылға сотталса, кәсіпкерлер Мұханбеталы Шалқарбеков пен Берік Өскембаев 5 жылдан шартты түрде жаза алды.
Алайда 2026 жылғы ақпанда Алматы қалалық соты үкімді жойды. Кейін наурызда қылмыстық іс қылмыстық-процестік заңнаманың бұзушылықтарын жою үшін прокурорға қайтарылды.
Сот құжаттарына сәйкес, бірінші сатыдағы сот тергеудің толық еместігіне және процессуалдық бұзушылықтарға жол берген. Атап айтқанда, Ахмеджанов бес эпизод бойынша тек мамандардың қорытындылары негізінде кінәлі деп танылған, алайда олардың біліктілігі мен құзыреттілігі тиісінше тексерілмеген. Сонымен қатар, бірнеше эпизод бойынша залал мөлшері жер учаскелерінің нарықтық және кадастрлық құны арасындағы айырма ретінде анықталған, бірақ бұл есептеулер де күмән тудырған. Іс материалдарында залал мөлшерін растайтын аудиторлық қорытындылар мен сот-экономикалық сараптамалар болмаған.
Бүгінгі сот отырысы сағат 10:00-ге тағайындалғанымен, 11:45-те ғана басталды. Іс Алматы қаласының қылмыстық істер жөніндегі мамандандырылған ауданаралық сотында судья Бақытхан Бакирбаевтың төрағалығымен қаралуда. Сотталушылар мен жәбірленушілер сот залында фото және бейнетүсірілімге қарсы болды.
Алмасхан Ахмеджанов 2023 жылы жазда ұсталған. Оны Алматыда жер учаскелерін беру және нысандардың құрылысын келісу кезінде лауазымдық өкілеттіктерін теріс пайдаланды деп күдіктенген. Сотта урбанистиканың бұрынғы басшысы өзіне тағылған айыптармен келіспейтінін және өз ақтығын дәлелдеуге ниетті екенін мәлімдеді. Сондай-ақ ол денсаулығына байланысты проблемалары барын айтты.
Дереккөз: Inform.kz