Алматыда қатты жел салдарынан ағаштардың құлауы тіркелді. Қала әкімдігі тұрғындарға мұндай жағдайларда қайда жүгіну керектігін айтты, деп хабарлайды Almaty.news ақпарат агенттігі.
Алматы әкімдігінің баспасөз қызметінің хабарлауынша, 10 маусым кешке қалада байқалған қолайсыз ауа райы мен қатты жел салдарынан ағаштардың, бұтақтардың құлауы және жекелеген құрылыстардың зақымдануы тіркелген.
Экология және қоршаған орта басқармасы авариялық ағаштарды анықтау және кесу бойынша тұрақты негізде жұмыс жүргізеді. Бұл ағаштар азаматтар мен қала инфрақұрылымының қауіпсіздігіне қатер төндіреді. Ауа райы нашарлаған кезеңде қаланың барлық аудандарында кезекші бригадалар ұйымдастырылып, олар түскен өтініштерге жедел ден қойып, стихия салдарын жойды, — делінген әкімдік хабарламасында.
Ведомство жағдайдың тұрақты бақылауда екенін атап өтті.
Қазіргі уақытта жасыл желектерді тексеру, әлеуетті авариялық ағаштарды анықтау және қала тұрғындарының қауіпсіздігін қамтамасыз етуге бағытталған қажетті шараларды жүргізу жұмыстары күшейтілді, — деп қосты баспасөз қызметі.
Алматылықтарға авариялық ағаштар анықталған жағдайда тиісті шаралар қабылдау үшін хабарласуға болатыны айтылды.
Дереккөз: Nur.kz