Алматыда халық үшін қатты тұрмыстық қалдықтарды жинау, тасымалдау, сұрыптау және көму тарифін түзету жоспарланып отыр. Өзгерістер ҚҚС мөлшерлемесінің өсуіне байланысты, ал әлеуметтік осал топтар үшін жеңілдіктер қарастырылған, деп хабарлайды Almaty.news ақпарат агенттігі.
Алматы қаласы мәслихатының депутаттары халық үшін қатты тұрмыстық қалдықтарды (ҚТҚ) жинау, тасымалдау, сұрыптау және көму тарифін түзету туралы шешім жобасын қолдады. Қалалық экология және қоршаған орта басқармасының басшысы Серік Әділбаевтың айтуынша, өзгерістер тек 2026 жылдың 1 қаңтарынан бастап күшіне енген қосылған құн салығы мөлшерлемесінің 12%-дан 16%-ға дейін көтерілуіне байланысты.
Оның сөзінше, тарифтің қалған құрамдас бөліктері өзгеріссіз қалады. Нәтижесінде халық үшін қызмет құны шамамен 3,6%-ға артады.
«Тарифтің өзгеруі тек ҚҚС мөлшерлемесінің 12%-дан 16%-ға дейін көтерілуіне байланысты. Сонымен қатар әлеуметтік осал топтар үшін қатты тұрмыстық қалдықтарды шығару қызметтеріне ақы төлеу бойынша жеңілдіктер қарастырылған», — деп атап өтті Әділбаев.
Тарифтің көтерілуімен қатар қалада әлеуметтік қолдау шаралары енгізіледі. Ұлы Отан соғысының ардагерлері қоқыс шығару қызметіне ақы төлеуден толық босатылады. Ұлы Отан соғысына қатысушыларға теңестірілген адамдар, I топтағы мүгедектер, бала кезінен мүгедектер, сондай-ақ ерекше қажеттіліктері бар балалар мен жетім балалардың ата-аналары мен заңды өкілдері 50% жеңілдік алады. II топтағы мүгедектер мен әлеуметтік осал топтар үшін 25% жеңілдік қарастырылған.
Дереккөз: Inalmaty.kz