Жыл басынан бері Алматыда мүліктік қылмыстар саны 23%-ға төмендеді. Пәтер және қалта ұрлықтары, автокөліктер мен ұялы телефондардан ұрлық азайған, деп хабарлайды Almaty.news ақпарат агенттігі.
Бұл туралы өңірлік коммуникациялар қызметінің брифингінде қалалық полиция департаментінің ресми өкілі Салтанат Әзірбек мәлімдеді. Оның дерегінше, пәтер ұрлықтары 26%-ға, автокөліктерден ұрлық 34%-ға, қалта ұрлықтары 7,7%-ға, ал ұялы телефондарды заңсыз иелену жағдайлары 18%-ға азайған.
— Жыл басынан бері полицияның жедел бөлімшелері бөтен мүлікті ұрлауға маманданған алты қылмыстық топты ұстады. Олардың құрамында барлығы 36 адам бар, олар шамамен 50 қылмыс эпизодына қатысты, — деді ол.
Мүліктік қылмыстардың жалпы төмендеуіне қарамастан, жазғы кезеңде Алматыда велосипедтер, мопедтер мен самокаттарды ұрлау жиі тіркеледі. Көбінесе иелерінің өздері қылмыскерлерге тапсырманы жеңілдетеді: көлікті қараусыз қалдырады, құлыптарды пайдаланбайды немесе адам аз жерлерге қояды.
Осыған байланысты мегаполистің тұрғындарына қауіпсіздіктің негізгі шараларын сақтау ұсынылады: сенімді құлыптарды пайдалану, мүлікті қауіпсіз жерлерде сақтау және мүмкіндігінше бейнебақылау жүйелерін орнату.
Қылмыстардың алдын алу және ашуда бейнебақылау камералары ерекше рөл атқарады. Қоғамдық қауіпсіздік пен жол тәртібін қамтамасыз етуде шамамен 186 мың камера қолданылады. Жыл басынан бері Алматыда қалалық бейнебақылау жүйелерінің арқасында үш мыңға жуық бөтен мүлікті ұрлау ашылды.
Салтанат Әзірбек ұрлықтар көбінесе адам көп жиналатын жерлерде болатынын нақтылады. Көп жағдайда ұрланған заттар — ноутбуктер, гаджеттер, ұялы телефондар мен зергерлік бұйымдар — иелеріне заңда белгіленген тәртіппен қайтарылады: не сот шешімі бойынша, не тергеу барысында процессуалдық құжаттар негізінде.
Дереккөз: Inform.kz