Алматыда жүкті әйелге шұғыл кесар тілігі жасалды, алайда нәресте өлі дүниеге келді, ал келесі күні науқас жансақтау бөлімінде көз жұмды, деп хабарлайды Almaty.news ақпарат агенттігі.
Марқұмның жұбайы Алексей Ефименко КТК арнасына берген сұхбатында әйеліне жүктіліктің соңғы кезеңінде шұғыл кесар тілігі жасалғанын, бірақ бала өлі туылғанын, ал келесі күні ол жансақтау бөлімінде қайтыс болғанын мәлімдеді. Сондай-ақ, ол әйелі бастапқыда денсаулығының нашарлауына және есінен тануына шағымданғанын, ауруханаға жатқызылып, перинаталдық орталыққа жеткізілгенін айтты. Оның пікірінше, оқиғаның себептері әзірге түсініксіз.
Алдын ала сот-медициналық сараптама қорытындысы миға қан құйылу мен бассүйек-ми жарақатын анықтады.
Алматы қаласы Қоғамдық денсаулық сақтау басқармасының хабарлауынша, науқасқа реанимациялық және хирургиялық шаралар көрсетілген, бірақ оны да, баланы да аман алып қалу мүмкін болмаған. Басқарма сот-медициналық сараптама аяқталғаннан кейін түпкілікті қорытынды шығарылатынын атап өтті.
Оқиғаның мән-жайы тексеріліп жатыр. Бұған дейін жүкті қазақстандық әйел комаға түсіп, қайтыс болғаны, нәрестенің де аман қалмағаны туралы хабарланған еді.
Дереккөз: Zakon.kz