Алматыда полиция профилактикалық рейдтер кезінде түнгі үш ойын-сауық мекемесінен кәмелетке толмағандарды тауып, олардың кейбірінің алкоголь ішкенін анықтады. Нәтижесінде мекемелердің жұмысы тоқтатылып, иелері мен қызметкерлері жауапкершілікке тартылды, деп хабарлайды Almaty.news ақпарат агенттігі.
Медеу ауданында өткен рейдтерде полиция бірнеше ойын-сауық мекемесінен заң бұзушылықтарды анықтады. Тексеріс барысында түнгі уақытта мекемелерде кәмелетке толмағандар болғаны, олардың кейбірінің алкогольдік ішімдік ішкені анықталды.
Рейд қорытындысы бойынша мекеме иелері мен қызметкерлері жауапкершілікке тартылды. Оларға кәмелетке толмағандарды түнгі уақытта кіргізу және алкоголь өнімдерін сату ережелерін бұзу айыптары тағылды. Ең қатаң шара үш мекемеге қатысты қолданылып, олардың қызметі тоқтатылды.
Медеу ауданы полиция басқармасының бастығы Жәнібек Шынасыловтың айтуынша, кәмелетке толмағандардың түнгі ойын-сауық мекемелерінде болуы олардың қауіпсіздігіне қатер төндіреді және заң бұзушылық болып табылады.
Сонымен қатар, кәмелетке толмағандардың заңды өкілдері де бала тәрбиесі мен бақылау міндеттерін тиісінше орындамағаны үшін жауапкершілікке тартылды. Полиция мұндай фактілер ерекше бақылауда екенін және оларды анықтау мен жолын кесу жұмыстары жалғасатынын атап өтті.
Дереккөз: Nur.kz