Наурызбай ауданы әкімдігінде өткен кездесуде кәсіпкерлер экологиялық талаптарды, модернизация шығындарын және қолдау шараларын талқылады, деп хабарлайды Almaty.news ақпарат агенттігі.
Жиынға аудан әкімдігі, Алматы қалалық экология және қоршаған орта басқармасы, «Eco Almaty» ЖШС, салалық қауымдастықтар мен кәсіпкерлер қатысты.
Негізгі тақырып – Алматы маслихаты 2025 жылғы 30 желтоқсанда бекіткен Атмосфералық ауаны қорғау қағидалары. Кәсіпкерлерге қолданыстағы экологиялық талаптар, нысандарды кезең-кезеңімен жаңғырту және зиянды шығарындыларды азайту шаралары түсіндірілді.
Экологиялық отын түрлеріне көшу, шығарындыларды тазарту жүйелерін орнату және бизнесті қолдау мүмкіндіктеріне ерекше назар аударылды. Ашық диалог барысында кәсіпкерлер туындаған қиындықтарды тікелей талқылап, сұрақтарына жауап алды.
«Eco Almaty» ЖШС өкілдерінің айтуынша, мұндай кездесулер тұрақты негізде өткізіліп, шағын және орта бизнестің әртүрлі салаларын қамтиды.
Атмосфералық ауаны қорғау қағидалары Алматыдағы экологиялық ахуалды жақсартуға бағытталған. Құжат газдандырылған аудандарда қатты және сұйық отынды пайдаланудан бас тартуды, шығарындыларды тазарту жүйелерін міндетті түрде орнатуды және ауаның ластануын азайтудың өзге де шараларын көздейді.
2025 жылғы 27 қарашадан бастап шағын және орта бизнестің 2 100-ден астам нысаны тексерілді, оның ішінде техникалық қызмет көрсету станциялары, қоғамдық тамақтану нысандары және монша кешендері бар. Қатты отынды пайдаланатын 760 нысан анықталды, оның ішінде 110-ға жуық кәсіпорын шығарындыларды тазарту жүйелерін орнатты.
Дереккөз: Almaty.tv