Алматы қаласының полиция департаменті мопед иелеріне арнап ресми үндеу жариялады. Ведомство мәліметінше, тіркеу үшін иелері тұрғылықты жері бойынша мамандандырылған халыққа қызмет көрсету орталығына (СпецЦОН) жүгініп, қажетті құжаттарды тапсыруы керек, деп хабарлайды Almaty.news ақпарат агенттігі.
Тіркеу рәсімі аяқталған соң иесіне мемлекеттік тіркеу нөмірі мен техникалық паспорт беріледі. Сонымен қатар сақтандыру полисін рәсімдеу міндетті.
Сондай-ақ мопедті басқаруға тек А1 санатындағы жүргізуші куәлігі болған жағдайда ғана рұқсат етіледі.
«Тіркеусіз және тиісті жүргізуші куәлігінің санатынсыз көлік құралын пайдалануға тыйым салынады», – делінген үндеуде.
Бұған дейін Қазнетте Түркістаннан түсірілген видео талқыға түскен еді. Онда полиция қызметкерлерінің заң бұзушыларды ұстау кезіндегі әрекеттері көрсетілген. Бір сәтте полицей секіріп барып мопед жүргізушісін жығып жіберсе, екінші күдікті қашып құтылмақ болған.
Тіркеу үшін қажетті құжаттар тізімі:
- жеке басты куәландыратын құжат;
- техникалық құжат немесе мопедтің техникалық сипаттамалары туралы мәліметтер;
- есепке қою туралы өтініш;
- көлік құралын тексеру актісі;
- мемлекеттік баждарды төлегені туралы түбіртек.
Дереккөз: Zakon.kz