Алматы тұрғындары ежелгі қорғанның орнына мектеп салу үшін оны бұзуға наразылық білдірді. Қалалық әкімдік бұл шешімді қорғанның тарихи-мәдени құндылығын жоғалтқанымен түсіндірді, деп хабарлайды Almaty.news ақпарат агенттігі.
31 арнаның мәліметінше, қорғанды бұзып, орнына жаңа мектепке апаратын жол салынады. Бұл жаңалық әлеуметтік желіде үлкен резонанс тудырды.
«Абыржытады, бұл халықтың мәдени мұрасын жою – қылмыс! Тарихи ескерткішті сақтауды талап етеміз!» – деп жазды алматылықтар.
Көптеген тұрғын мұндай қорғандардың әлемде сирек кездесетінін айтып, оны сақтап қалуды сұрады. «2000 жыл бойы қорған тұрды. Соғыстар, төңкерістер мен құрылыстар кезінде ешкім қол тигізбеген, ал енді оны айналып өту мүмкін емес пе? Мұндай қорғандар – сирек, тек Қазақстанда, Жапонияда және Кореяда ғана бар», – деп жазды қала тұрғындары.
Алматы әкімдігінің мәліметінше, 2015 жылы қорған зерттеліп, жергілікті маңызы бар тарих және мәдениет ескерткіштерінің мемлекеттік тізімінен алынып тасталған. Себебі ол тарихи-мәдени құндылығын жоғалтқан. Нысан авариялық жағдайда болған және антропогендік әсерге ұшыраған. Қазір аталған учаскеде жаңа мектепке кіреберіс жолдың құрылысы жүріп жатыр.
«2024 жылы жүргізілген тарихи-мәдени сараптама нысанның тарихи-мәдени құндылығын жоғалтқаны және оны әрі қарай тарих және мәдениет ескерткіші ретінде сақтау мүмкін еместігі туралы бұрын анықталған қорытындыларды растады», – деп атап өтті Алматы қалалық мәдениет басқармасының тарихи-мәдени бөлімінің басшысы Ләззат Мырзабекова.
Дереккөз: Nur.kz