Алматыда киножобалардың ашық қорғауы басталды. Биылғы конкурстың финалдық кезеңіне 95 киножоба қатысып, мемлекеттік қаржыландыру мен ұлттық фильм мәртебесіне үміткер, деп хабарлайды Almaty.news ақпарат агенттігі.
Киножобалар конкурсы биылғы жылдың 1 наурызында басталды. Бірінші кезеңге электронды форматта 323 өтінім түсті. Материалдарды тексеруден кейін 277 жоба Сараптамалық кеңестің қарауына жіберілді. Бірінші кезеңнің қорытындысы бойынша екінші кезеңге 107 жоба өтті, олар сценарий және сценарий жоспарлары форматында ұсынылды. Құжаттардың толық пакетін қарағаннан кейін 95 жоба питчингке қатысу құқығын алды.
Ашық қорғаудың бірінші күнінде қатысушылар сарапшыларға көркем фильм санаттарындағы жобаларды ұсынды. Үш күн бойы авторлар өз жұмыстарын Сараптамалық кеңеске таныстырады. Қорытынды бойынша мемлекеттік қаржыландыру мен ұлттық фильм мәртебесіне үміткер жобалар бойынша ұсынымдар қалыптастырылады.
Питчинг — конкурстың маңызды кезеңі, мұнда авторлар өз жобасын Сараптамалық кеңеске ұсынып қана қоймай, тақырыптардың өзектілігін, команданың кәсіби деңгейін және болашақ фильмнің әлеуетін көрсете алады. Кино орталығы үшін іріктеудің барлық кезеңдерінің ашықтығы мен әділдігін қамтамасыз ету маңызды. Биылғы жобалар қазіргі қазақстандық киноның дамуына үлес қосып, өз көрерменін табады деп сенемін, — деді Ұлттық киноны қолдау мемлекеттік орталығының басқарма төрағасы Құрманбек Жұмағали.
Биылғы жылы басым тақырыптар тізіміне отбасы және ұрпақ сабақтастығы, тарих және мәдени мұра, қазіргі еңбек қаһарманының бейнесі, балалар фильмдері, экология, спорт және салауатты өмір салты, сондай-ақ бірлік, бейбітшілік және қоғамдық келісім идеялары енді.
Соңғы жылдары ұлттық кино саласында бірқатар оң өзгерістер байқалады. Бұл кәсіби салалық қоғамдастықпен бірлесіп жүргізіліп жатқан жүйелі жұмыстың нәтижесі. Мемлекеттік қолдаумен түсірілетін фильмдердің сапасы мен жанрлық алуандығы жыл сайын артып келеді. Бұл көбінесе жобаларды конкурстық іріктеу ережелерін жетілдіру, талаптарды күшейту, сондай-ақ ашықтық пен әділдік қағидаттарына басым назар аударудың арқасында мүмкін болды. Биылғы конкурс та осы негізгі қағидаттарға баса назар аудара отырып өткізілуде. Жас кинематографистердің белсенділігін ерекше атап өткім келеді. Олардың бастамалары жаңа идеяларымен ерекшеленіп, саланың дамуына қосымша серпін береді, — деп жазды Қазақстан Республикасы Премьер-Министрінің орынбасары — Мәдениет және ақпарат министрі Аида Балаева өзінің Facebook парақшасында.
Бұған дейін «Қыз Жібек» фильмінің бас кейіпкерінің костюмі «Қазақфильм» мұражайына қайтарылатыны хабарланған болатын.
Дереккөз: Inform.kz