Іле-Алатау ұлттық паркіндегі фотокақпан түнде қызыл кітапқа енген тяньшань қоңыр аюының бірегей сәттерін түсірді. Жыртқыштың ағаштарға арқасы мен бүйірін ысқылауы — бұл аумақты белгілеу тәсілі, деп хабарлайды Almaty.news ақпарат агенттігі.
Қоңыр аюлар аумақты белгілеу үшін бірнеше әдіс қолданады: ағаштарға денесін ысқылау, тырнақ іздерін қалдыру, жерді қазып шұңқыр жасау, бір жолмен бірнеше рет жүру және экскремент қалдыру. Әдетте еркек тяньшань қоңыр аюлары ұрғашыларынан ірі болады. Қорек базасы жеткілікті болса, бірнеше особьтың аумақтары қабаттасуы мүмкін.
Іле-Алатау мемлекеттік ұлттық табиғи паркі Алматының оңтүстік шекарасына жақын, Іле Алатауының баурайында орналасқан. Қала орталығынан паркке кіреберістерге дейін көлікпен 15-30 минутта жетуге болады.
Бұған дейін Жетісу тауларындағы қонақүйлердің біріне қоңыр аюдың кіруінің салдары көрсетілген кадрлар тараған еді. Мамандар бұл алаңдатарлық сигнал екенін айтты.
Дереккөз: Zakon.kz