Алматы тұрғындары Сайын мен Абай қиылысындағы көлік айырбасында жүргізіліп жатқан жөндеу жұмыстарына таңданыс білдірді. Олардың айтуынша, мердігерлер ескі жабынды алып, орнына дәл сондай жаңасын төсеп жатыр, деп хабарлайды Almaty.news ақпарат агенттігі.
EgovPress Telegram-арнасында жарияланған видеода жұмысшылардың Алматыдағы ірі көлік айырбастарының бірінде жабынды жаңартып жатқаны көрсетілген. Әлеуметтік желілердегі пікірлерге сәйкес, қала тұрғындары бұрынғы плитка немесе гранит берік болғанын, ал қазіргі сылақ жаңбыр мен қардан кейін тез бұзылатынын айтады.
«Мердігерлер қауіпсіздік техникасын бұзып, ескі жабынды алып, дәл сондай жаңасын салып жатыр. Қала тұрғындары бұрынғы плитка немесе гранит берік болғанын, ал қазіргі сылақ жаңбыр мен қардан кейін тез бұзылатынын айтады», — делінген хабарламада.
Алматы қаласы әкімдігінің баспасөз қызметі NUR.KZ-дің сауалына жауап беріп, Сайын көшесі мен Абай даңғылының қиылысындағы көлік айырбасында ағымдағы жөндеу жұмыстары жүргізіліп жатқанын, ақаулы қаптаманы жаңартып, қорғаныш жабынды қалпына келтіріп жатқанын хабарлады.
«Ақаулар (жарықтар, сынықтар, қабаттану) соңғы 7 жыл ішінде пайда болды. Қазіргі заманғы ылғалға төзімді материалдар қолданылуда. Мақсат — бұзылудың алдын алу, қызмет мерзімін ұзарту және қауіпсіздікті қамтамасыз ету. Жұмыс жүргізу кезінде қауіпсіздік ережелерін бұзу фактісі бойынша мердігер ұйыммен түсіндіру жұмысы жүргізілді, еңбек қауіпсіздігі мәселесі ерекше бақылауда», — деп жауап берді әкімдік.
Дереккөз: Nur.kz