Алматы қаласының әкімдігі әлеуметтік кәсіпкерлік субъектілерінің тізіліміне енуге өтінімдер қабылдауды бастады. Құжаттарды Алматы қаласының Кәсіпкерлік және инвестициялар басқармасы қабылдайды, деп хабарлайды Almaty.news ақпарат агенттігі.
Өтінімді шағын және орта бизнес субъектілеріне жататын жеке кәсіпкерлер мен заңды тұлғалар бере алады. Әлеуметтік кәсіпорын мәртебесі халықтың әлеуметтік осал топтарын қолдауға, жұмыс орындарын құруға, осындай топтар үшін тауарлар өндіруге және қызметтер көрсетуге, сондай-ақ қоғамдық пайдалы, білім беру және мәдени-ағарту жобаларын іске асыруға бағытталған кәсіпкерлерге беріледі.
Әлеуметтік кәсіпкерлер үшін арнайы мемлекеттік қолдау шаралары қарастырылған. Олардың қатарында 5 млн теңгеге дейінгі мемлекеттік гранттар, жеңілдікпен үй-жайлар беру және жеңілдетілген несиелеу бағдарламалары бар.
Өтінімдерді қабылдау 2026 жылғы 1 маусымнан 15 маусымға дейін (қоса алғанда) Алматы қаласы, Байзақов көшесі, 303, 3-қабат, 302-кабинет мекенжайы бойынша жүргізіледі.
Белгіленген мерзім аяқталғаннан кейін берілген құжаттар қаралмайды. Сондай-ақ, құжаттар топтамасы толық болмаған немесе жалған мәліметтер берілген жағдайда өтінім қайтарылуы мүмкін.
Қосымша ақпаратты +7 (727) 390-20-99 телефоны арқылы алуға болады. Байқау шарттарымен және қажетті құжаттар тізімімен https://adilet.zan.kz/rus/docs/V2300033105 сайтынан танысуға болады.
Дереккөз: Almaty.tv