Алматыда кешенді көлік реформасы дайындалып жатыр. Ол «ақылды» бағдаршамдарды енгізу, жаңа автобус бағыттарын іске қосу және ЛРТ желісін салуға дайындықты қамтиды, деп хабарлайды Almaty.news ақпарат агенттігі.
Қалалық жол жүрісін ұйымдастыру және жолаушылар көлігі басқармасының басшысы Ержан Диханбаев РСК-да өткен баспасөз мәслихатында басты міндет — көлік кептелісін азайту және қоғамдық көліктің тартымдылығын арттыру екенін айтты.
Билік халықаралық тәжірибені зерттеп, кешенді шараларды енгізуде: бөлінген жолақтарды дамыту, трафикті басқаруды цифрландыру, көлік-ауыстыру тораптарын салу және маршруттық желіні жаңғырту.
Қозғалысты басқарудың интеллектуалды жүйелеріне ерекше назар аударылады. Қалада бағдаршамдар жаңғыртылып, камералар мен дрондар арқылы көлік модельдеу енгізілуде, сондай-ақ жекелеген көшелерде бір бағытты қозғалыс енгізу қарастырылуда.
Маршруттық желіні жаңарту аясында 2026 жылы №96 және №130 екі жаңа автобус бағыты іске қосылды. Болашақта «Әуезов-сити» шағын ауданына қызмет көрсетуді қоса алғанда, жаңа бағыттарды іске қосу жоспарлануда. Сонымен қатар қолданыстағы маршруттардың жүктемесіне талдау жүргізілуде.
Жыл соңына дейін қала қоғамдық көлікті экологиялық отын түрлеріне кезең-кезеңімен ауыстыруды жоспарлап отыр. Қазіргі уақытта автобустардың 60%-дан астамы газбен жұмыс істейді, бір бөлігі электр қуатымен және троллейбустармен жүреді. Сондай-ақ автобус парктерінің құрылысы жалғасуда.
Велоинфрақұрылым да дамып келеді: веложолдардың ұзындығын 125,5 км-ге дейін ұлғайту жоспарлануда, жаңа жолақтар орталық көшелер мен даңғылдарда пайда болуы мүмкін.
Сонымен қатар Алматыда ақылы тұрақ жүйесі кеңейтілуде, 2026 жылдың соңына дейін тағы 8 мың орын қосу жоспарлануда.
Реформаның жеке блогы ретінде ұзындығы 18,3 шақырым болатын ЛРТ желісінің құрылысы қарастырылған. Жоба мемлекеттік сараптамадан өтіп жатыр, құрылыс жұмыстары оң қорытынды алынғаннан кейін басталады. Желі қаланың негізгі аудандарын, оның ішінде Төле би, Абылай хан көшелері мен Алатау ауданын байланыстырады.
Қалада жол инфрақұрылымын жаңғырту және тасымалдаушыларды бақылауды күшейту жалғасуда. Билік қоғамдық көлікке қызмет көрсету сапасын қадағалайтын бақылау-желілік қызмет құруда.
Әкімдік «ақылды» бағдаршамдарды енгізу және көлік ағындарын үйлестіру көшелердің өткізу қабілетін арттырып, қаладағы кептеліс деңгейін төмендетуі керек екенін атап өтті.
Дереккөз: Inalmaty.kz