Алматыда Халықаралық музейлер күніне орай «Музей түні» акциясы өтіп жатыр. Кешкі сағат 18:00-ден түн ортасына дейін қала тұрғындары мен қонақтары мегаполистегі музейлерге тегін кіре алады, деп хабарлайды Almaty.news ақпарат агенттігі.
Акция бірнеше мәдени алаңды қамтиды: Алматы тарихы музейі, Ықылас атындағы халық музыкалық аспаптар музейі, Ахмет Байтұрсынұлының үй-музейі, Дінмұхамед Қонаев, Сәбит Мұқанов, Ғабит Мүсірепов музейлері, Нұрғиса Тілендиевтің мемориалдық музейі, Дәстүрлі музыка мультимедиялық орталығы және басқа да мекемелер.
Сондай-ақ бағдарламаға Қазақстан Республикасының Ұлттық орталық музейі қосылды. Мұнда сирек экспонаттар, мұрағат құжаттары, антикварлық заттар және Қазақстанның әртүрлі тарихи-мәдени кезеңдерін көрсететін коллекциялар қойылған тақырыптық көрмелер ашылды.
Солардың ішінде — қазақ кілем өнеріне арналған «Масатыдай құлпырған…» көрмесі. Мұнда сирек кездесетін түкті, түксіз және қабырға кілемдері, сондай-ақ қайта қалпына келтірілген бірегей экспонаттар ұсынылған. Музей қорында ХХ ғасыр басына жататын 300-ден астам кілем мен тоқыма бұйымдары сақтаулы.
«Бірегей» экспозициясы асыл металдардан жасалған антикварлық бұйымдарды, сағаттар мен шамдалдар коллекциясын біріктіреді, олар XII ғасырдан бастап кезеңді қамтиды.
Фалеристика көрмесі «Төсбелгілердегі тарихи-деректік көріністер» ерекше назарға ие. Көрмеде спорт, білім, мәдениет және Қазақстанның әр кезеңдегі қоғамдық өміріне байланысты значоктар, төсбелгілер мен естелік наградалар қойылған. Қазір Ұлттық музей қорында 12 103 бірлік фалеристикалық материал сақталады, оның 3600-ден астамы — значоктар.
Сондай-ақ Ұлттық музейде Қазақ радиосының 105 жылдығына және «Шалқар» радиосының 60 жылдығына арналған «Ұлттың үнбайрағы» мерейтойлық көрмесі өтуде. Көрмеде мұрағат құжаттары, фотоматериалдар, техникалық құрылғылар, сондай-ақ белгілі радиожүргізушілер мен радио қызметкерлерінің жеке заттары ұсынылған. Келушілер Мұхтар Әуезов, Бердібек Соқпақбаев, Тахауи Ахтанов, Әнуарбек Байжанбаев пен Мұқағали Мақатаевтың «Алтын қорда» сақталған бірегей дауыстарын ести алады.
Бағдарламада Мұхтар Әуезов атындағы Қазақ ұлттық драма театрының 100 жылдығына арналған «Ғасыр жасаған ұлт театры» көрмесі де бар. Экспозиция театрдың 1917–1930 жылдардағы қалыптасу кезеңінен қазіргі уақытқа дейінгі бай тарихын қамтиды.
«Музей түні» жылдағы ең күтілетін мәдени акциялардың біріне айналды, өйткені ол келушілерге музей кеңістігін ерекше форматта — экспонаттар сақталатын орын ғана емес, қарым-қатынас, шығармашылық және интерактив үшін тірі алаң ретінде көруге мүмкіндік береді.
Биыл қала музейлері интерактивті бағдарламалар, дәрістер мен кездесулер алаңына айналды. Оқиға музейлердің мәдени мұраны сақтаудағы, тарихи сананы қалыптастырудағы және қоғамдық мәдени диалогты дамытудағы маңызды рөлін ашуға бағытталған.
Бұл түні қала музейлерінде келушілерді тарихи кейіпкерлер, актерлер мен музыканттар қарсы алады. Сонымен қатар келушілер керамика жасау, кілем тоқу, дәстүрлі қазақ қолөнерімен айналыса алады. Музыкалық және сахналық бағдарлама акцияның негізгі бөліктерінің біріне айналады. Әртүрлі музейлерде этно- және фольклорлық топтар өнер көрсетеді.
Дереккөз: Inform.kz