Алматыда жол қозғалысын жақсарту үшін жаңа шешімдер енгізілуде. 2025 жылы қаладағы 10 қиылыста «вафельді» белгілеу пайда болды. Бұл белгілеу қиылыс шекарасын көрсетіп, алда кептеліс болса, шығуға болмайтынын ескертеді, деп хабарлайды Almaty.news ақпарат агенттігі.
Қалалық жол қозғалысын ұйымдастыру және жолаушылар көлігі басқармасының мамандары «вафельді» белгілеудің негізгі мақсаты – кептелістерді азайту, әсіресе қарбалас уақытта, қозғалыстың үздіксіздігін қамтамасыз ету және жүргізушілердің тәртібін арттыру екенін айтты.
Алайда басқарма бұл белгілеудің тиімділігі туралы статистиканы ұсынбады. Ведомство тек «вафельді» белгілеуге шығып, тоқтағаны үшін айыппұл енгізу мәселесі шешілу үстінде екенін атап өтті.
Қазіргі уақытта «Көркем Телеком» ЖШС «Сергек Алматы» филиалы Алматы полиция департаментімен бірлесіп, ҚР Бас прокуратурасының Құқықтық статистика және арнайы есепке алу комитетіне бұл бұзушылықты деректерді өңдеу жүйесіне қосу туралы ұсыныс жолдады.
Қазір айыппұлды ресми түрде енгізу үшін Бас прокуратураның рұқсаты қажет. Шешім оң болса, «вафельді» белгілеу жаяу жүргіншілер көп жүретін басқа да қиылыстарда енгізіледі, — делінген хабарламада.
2026 жылдың ақпанында Алматыда бірқатар қиылыстарда қозғалыс схемасын түзету бойынша пилоттық жоба іске қосылды. Жоба аясында жаяу жүргіншілер мен көлік үшін бағдаршамның жеке фазалары енгізілді. Өзгерістер мына қиылыстарда енгізілді: Төле би — Масанчи, Жамбыл — Масанчи, Абай — Масанчи, Жібек жолы — Масанчи, Төле би — Наурызбай батыр, Жамбыл — Наурызбай батыр, Абай — Наурызбай батыр, Жібек жолы — Наурызбай батыр, Төле би — Құрманғазы, Жамбыл — Құрманғазы, Абай — Құрманғазы, Жібек жолы — Құрманғазы, Төле би — Байтұрсынов, Жамбыл — Байтұрсынов, Абай — Байтұрсынов, Жібек жолы — Байтұрсынов.
Ведомствоның мәліметінше, бұл учаскелерде жаяу жүргіншілер өткенде көлік қозғалысының барлық бағыты тоқтайды. Бұл жаяу жүргіншілерге бұрылатын көліктерге кедергі келтірмей, қауіпсіз өтуге мүмкіндік береді.
Бұл жолдардың өткізу қабілетіне оң әсер етеді, өйткені жүргізушілер жаяу жүргіншілерді күтіп тұрмайды және рұқсат сигналы қосылғанда қиылыстарды тезірек өте алады. Қазір схема талдау сатысында. Тиімділігі расталса, мұндай фазалар қаланың басқа да қарбалас қиылыстарында енгізіледі, — деп түсіндірді басқарма мамандары.
Сонымен қатар, басқарма жол қозғалысын жақсарту үшін қаладағы бір бағытты көшелер санын көбейту мүмкіндігі қарастырылып жатқанын хабарлады. Бұл шара жол қозғалысын оңтайландыру және жолдардағы қақтығыс нүктелерін азайту тәсілдерінің бірі ретінде зерттелуде. Алайда бұл алдын ала талқылау сатысында. Нақты учаскелерде бір бағытты қозғалысты енгізу туралы түпкілікті шешім көлік ағындарын жан-жақты талдап, барлық қызметтермен толық келісілгеннен кейін қабылданады.
Еске салайық, 2018 жылы Алматыда Жамбыл, Бөгенбай батыр, Мақатаев, Гоголь, Шәріпов, Мұратбаев, Қабанбай батыр және Қарасай батыр көшелері бір бағытты болды.
Дереккөз: Inform.kz