18 мамырда Алматыда Халықаралық музей күніне орай «Музей түні-2026» атты ауқымды мәдени акция өтеді. Қала тұрғындары мен қонақтарын тегін экскурсиялар, театрландырылған қойылымдар, концерттер, көрмелер, шеберлік сабақтары мен квесттер күтеді, олар түн ортасына дейін созылады, деп хабарлайды Almaty.news ақпарат агенттігі.
Биыл акцияға мегаполистің жетекші мұражайлары қосылады: Алматы тарихы мұражайы, Ықылас атындағы халық музыкалық аспаптары мұражайы, Ахмет Байтұрсынұлының үй-мұражайы, Дінмұхамед Қонаев мұражайы, Сәбит Мұқановтың үй-мұражайы, Ғабит Мүсіреповтің үй-мұражайы, Нұрғиса Тілендиевтің мемориалдық мұражайы және дәстүрлі музыка мультимедиялық орталығы. Барлық мұражайлар сағат 10:00-ден 00:00-ге дейін ашық есік форматында жұмыс істейді, ал негізгі кешкі бағдарлама сағат 18:00-де басталады.
Келушілерге «Тарих ізімен» мұражайаралық квест, «Жұлдызды гид» және «Мұражайға сый» акциялары, театрландырылған экскурсиялар, интерактивті ойындар, керамика, кескіндеме және зергерлік өнер бойынша шеберлік сабақтары, сондай-ақ жасанды интеллект қолданылатын фотозоналар дайындалды.
Орталық оқиғалардың бірі – Алматы тарихы мұражайында «Қазақ киносының інжу-маржаны – Қыз Жібек» көрмесінің ашылуы. Экспозиция актриса Меруерт Өтекешованың 75 жылдығына арналады. Көрмеге «Қыз Жібек» фильмінің актерлері мен жасаушыларының жеке заттары қойылады.
Кешке қарай мұражайларда этно-фольклорлық ұжымдар мен танымал әртістердің қатысуымен концерттер, спектакльдер, ашық аспан астында кино көрсетілімдер және балалар мен ересектерге арналған интеллектуалды ойындар өтеді.
Ықылас атындағы халық музыкалық аспаптары мұражайы мұражайдың 45 жылдығына арналған арнайы бағдарлама дайындаса, Нұрғиса Тілендиевтің мемориалдық мұражайында Нұрғиса Тілендиев атындағы «Отырар сазы» оркестрі мен қазақстандық эстрада жұлдыздары өнер көрсетеді.
Сонымен қатар, Алматы галереясы Олжас Сүлейменовтің 90 жылдығына арналған «Жер, адамға тағзым ет» көрмесін ұсынады.
Акция аясындағы барлық іс-шаралар келушілер үшін тегін болады.
Дереккөз: Inalmaty.kz