Алматыда есірткі қылмысына қарсы күрес бөлімшесінің қызметкерлері интернет-дүкен арқылы есірткі сатумен айналысқан топтың жолын кесті, деп хабарлайды Almaty.news ақпарат агенттігі.
Жедел-іздестіру шаралары барысында үш азамат ұсталды. Олар туыстар болып шықты, тергеу нұсқасы бойынша, бұл адамдар рөлдері нақты бөлінген тұрақты топ құрамында әрекет еткен.
Жеке тексеру кезінде және күдіктілердің тұрғылықты жері мен болжамды қызмет орнында жүргізілген тінтулерде синтетикалық және өсімдік тектес есірткі заты бар орамалар, сондай-ақ электронды таразылар, орау материалдары және есірткіні сатуға дайындауға арналған басқа да заттар табылды.
Сонымен қатар, құқық қорғаушылар Алматы аумағында есірткі таратуға арналған жасырын орындарды анықтады.
Тәркіленген заттардың жалпы көлемі ірі партияға жатады. Олар сот сараптамасына жіберілді.
— Жүргізілген операция барысында қолда бар мәліметтер бойынша есірткінің заңсыз айналымына қатысқан топтың жолы кесілді. Фигуранттардың бірлесіп әрекет етіп, рөлдерді бөлісіп, тыйым салынған заттарды жүйелі түрде орап, таратқаны ерекше алаңдатады. Заңсыз айналымнан ірі партия есірткі және оларды сатуға дайындауға арналған жабдықтар алынды. Мұндай қылмыстар қоғамға, әсіресе жастарға үлкен қауіп төндіреді, — деді Алматы ПД есірткі қылмысына қарсы күрес басқармасының бастығы Батыржан Әбдімасаров.
Бұған дейін полиция Арыста екі ағайынды ұйымдастырған есірткі зертханасын жойған болатын. Операция барысында екі тоннадан астам тыйым салынған зат тәркіленді.
Дереккөз: Inform.kz