Алматы тұрғындарын жалпықалалық жоспарлы сейсмотренировка өтетіні туралы ескертті — бүкіл қалада сиреналар дыбысталады, деп хабарлайды Almaty.news ақпарат агенттігі Алматы ТЖД баспасөз қызметіне сілтеме жасап.
Алматы Төтенше жағдайлар департаментінің мәліметінше, сиреналар 14 мамырда сағат 11:00-де дыбысталады. Осы уақытта қалалық хабарлау жүйесі іске қосылып, сирена-сөйлеу құрылғылары, телерадиоарналарды ұстау, сондай-ақ мобильді қосымшалар арқылы хабарламалар жіберу жүргізіледі.
Жалпықалалық сейсмотренировкаға алдын ала дайындық жүріп жатыр: 12 мамырдан бастап телерадиоарналарда алдағы жоспарлы сейсмотренировка туралы ақпараттық бейнеролик көрсетіліп, тұрғындарға сабыр сақтау ұсынылады.
ТЖД мамандары дыбыстық хабарлау «Назар аударыңыздар!!!» — бұл ескерту сигналы екенін, ол төтенше жағдай қаупі немесе орын алған кезде халықтың назарын аудару үшін берілетінін еске салды.
«Дыбыстық сигналды естіген соң, теледидар мен радиоқабылдағыштарды қосып, интернет-ресурстар мен мобильді қосымшалардағы ақпаратты оқып, әрі қарайғы әрекеттер бойынша нұсқаулық алу қажет. Сейсмотренировка басталғанға дейін дабыл чемоданын дайындап, қауіпсіз жерге ең қысқа бағытты анықтаңыз. Естеріңізге саламыз, қауіпсіз орын — электр желілерінен, ағаштар мен ғимараттардан алыс орналасқан ашық алаң», — деді құтқарушылар.
Құтқарушылар өткізілетін қалалық сейсмотренировканың жоспарлы екенін атап өтіп, азаматтарды сабыр сақтауға және белсенді қатысуға шақырды.
«Жер сілкінісі болған жағдайда — үрейге берілмеңіз! Қауіпсіз орынға барыңыз. Дүмпулер аяқталған соң, ғимараттар мен құрылыстардан қауіпсіз қашықтыққа эвакуацияланыңыз, қажет болса, халықты қабылдау пункттеріне барыңыз», — деп еске салды ТЖД.
Алматы қаласында 384 халықты қабылдау пункті жұмыс істейтін болады.
Дереккөз: Nur.kz