Құтқарушылар Іле Алатауының биік таулы аймағында қар қорының айтарлықтай екенін анықтады, бұл сел қаупі бар кезеңде жағдайды қиындатуы мүмкін, деп хабарлайды Almaty.news ақпарат агенттігі.
Төтенше жағдайлар министрлігінің Telegram-арнасында хабарланғандай, «Қазселден қорғау» ММ және Алматы ТЖД мамандары Іле Алатауы жотасының орталық бөлігіне әуеден визуалды шолу жасады.
«Тексеру нәтижесінде биік таулы аймақта қар қорының едәуір екені анықталды. Қар сызығы теңіз деңгейінен 2600-2700 метр биіктікте бекінген. Мореналық көлдердің жағдайы тұрақты – су қоймалары қар астында, судың қосылуы байқалмайды», – делінген хабарламада.
Құтқарушылардың атап өтуінше, қазіргі тұрақтылыққа қарамастан, қардың мол қоры мен ықтимал температуралық ауытқулар алдағы сел қаупі бар кезеңде күрделі жағдай туғызуы мүмкін.
Дереккөз: Nur.kz